166v - - - - - @
Aulx exemplaires grecs il sadjouste un psalme de david
duquel sainct Athanase faict mention en in Sinopsi il se commance
parvus eram & au second verset le prophete royal dict
Manus meӕ @Manus meӕ fecerunt organum et digiti
mei aptarunt psalterium
Garder chastaignes
Il les fault laisser dans leur coquille herissonnee jusques
a ce quon les veuille manger Et avec cella les laisser en
lieu humide ou alagout de quelque toict
Bougie odorante du mans
Ils fondent parmy la cire & bougie de la rousine
quon apelle en France de bourgoigne qui est blanche
& non pas si brusque & seiche que laultre rousine
Ils parfument aussy le lumignon et meche
Adoulcir lor
Dissouldre du caput mortuum dans vinaigre
distille filtrer & congeler en sel & diceluy cementer ☉
& il ladoulcist merveilleusement
Augmenter la couleur du sol
Mects sur les cendres chauldes eau fort de vitriol
couvre dun tuile la bouteille cest a dire la gueule puys
destoupe & il sortira une fumee espesse sur laquelle
mects lor et il recepvra haulte taincture