076v - - - - - Pour faire couleur d’or fort belle
& de peu de d’espance
Premierement prenés escorce d’oranges bien jaulne, &
les nettoiés bien du blanc qui est dedans, & les
pulverisés tres bien et en ung mortier bien net. Et prenés
aultant de souffre, & broyés tout ensemble, et mectés le
tout en une fiolle de verre, & les gardés en la cave ou
aultre lieu humide par l’espace de huict ou dix jours. Puys
quand en vouldrés user, fault le chauffer et en user où
vous vouldrés, & vous verrés une fort belle coulleur.
Pour faire goumiche noyre
Prenés de la colle, & la destrampés aveq du vinaigre,
& la faictes fondre, et qu’elle soit bien claire. Et prenés du
noir de lampe ou aultre noir & le destrempés ensemble,
puys le posés sur boys.
Pour la blanche
Fault prandre de la cire blanche aveq de la ceruze,
et fondés le tout ensemble, & le couchés sur boys ou
aultre chose.
Pour dorer sur fer ou
estaing
Premierement il fault laver ce que l’on veuld dorer
dedans lye de vin, et puis de rechief le laver aveq du vin
blanc, et prandre trois onces terra merita & choppine de
vin blanc, et faire bouillir les matieres l’espace de demye
heure & poser vos couleurs sur vostre fer ou estaing ou aultre,
et puys le laissés secher sur un pappier, & ne mectre
poinct la main en vos matieres.