Making and Knowing
A minimal edition of BnF Ms Fr 640

[TOC] | [translation]

- - - - - folio image: 076v - - - - -

Pour faire couleur dor fort belle
& de peu de despance

Premierement prenes Escorce doranges bien Jaulne &
les nettoies bien du blanc qui est dedans & les
pulverises tres bien et en ung mortier bien net Et prenes
aultant de souffre & broyes tout ensemble Et mectes le
tout en une fiolle de verre & les Gardes en la cave ou
aultre lieu humide
par lespace de huict ou dix jours puys
quand en vouldres user fault le chauffer et en user ou
vous vouldres & vous verres une fort belle coulleur

Pour faire Goumiche noyre

Prenes de la colle & la destrampes aveq du vinaigre
& la faictes fondre et quelle soit bien claire et prenes du
noir de lampe ou aultre noir & le destrempes ensemble
puys le poses sur boys

Pour La Blanche

Fault prandre de la Cire blanche aveq de la Ceruze
et fondes le tout ensemble & le couches sur boys ou
aultre chose

Pour dorer sur ferou
Estaing

Premierement Il fault laver ce que lon veuld dorer
dedans lye de vin Et puis de Rechief le laver avecq du vin
blanc
Et prandre trois onces terra merita & choppine de
vin blanc Et faire bouillir les matieres lespace de demye
heure & poser vos couleurs sur vostre fer ou Estaing ou aultre
Et puys le laisses secher sur un pappier & ne mectre
poinct la main en vos matieres