p119v - - - - - Facon d’acoustrer laspalte spat
Il se trouve en terre en Allemaigne de couleur de plastre cuit
faict à longs filets, fort doulx à manier. Et pource qu’il est
meslé de terre et ordure, on le pile grossierement & on en faict des
pelotes, l’ayant pour ces effect destrempé en eau de sel armoniac
de telle composition qu’il t’a esté dit cy dessus. On mect recuire ces
pelotes à foeu de la fornaise des potiers, puys on le destrempe
encores en mesme eau. La terre et le grossier et ordure vont au
fonds et le pur aspalte, qui est leger & douls et maniable comme
farine destrempée, adhære avec l’eau & va à la superficie
en brouillant l’eau, laquelle trouble se vuide en un vase
à part. Ayant residé, on vuide l’eau par inclination ou
bien on la retire avec un esponge, et le pur aspalte demeure
au fonds. Desseiche le & l’employe en chassis, estant
humecté d’eau de sel armoniac. Et l’essaye au chassis, dans
lequel s’il se retire estant recuit ou desseiché, c’est à dire
qu’il le fault encores recuire à bon feu et le rougir. Ainsy
pour medailles et choses plattes, sers toi de cestuy cy, car
c’est le plus parfaict de tous pour or, argent, cuivre, plomb, letton
& estaim, car il soubstient le feu & se rougist quand il est
besoing sans se corrompre. Et tant plus il sert, tant plus
il est b meilleur, & ne se gaste point. Au commancement il est
blanc & servant il vient gris. Touteffois prens garde de
mectre à part celuy qui a servi pour gecter plomb & estain
& letton, car l’or s’i aigriroit & n’i viendroit pas bien. Et
pour mieux faire tu pourras mectre à part d’iceluy pour
servir à chasque metal.
at left top margin
Voy Gesnerus
De lapidibus
at left top margin
Il endure
dix ou douze
gects sans se
corrompre,
il soubstient
le foeu & se
rougist, il est
propre pour
tous metaulx.
Il est si tenace
que, pour peu
que le chassis
soict canellé,
il tient.
at left middle margin
Le spat ne
faict presque
poinct de
prise, bien qu’il
soit recuit
& qu’il soit
espece de plastre.
Cru il se rompt
aysement avecq les
doigts.
Excellent secret pour mouler creus et fort subtil en or fin
Jecte avec ton sable susdict ton animal et lesarde ou aultre
chose avec argent de billon, & il viendra fort net. E Mays
advise de le mouler creux ou d’y laisser à tout le moins un trou,
dans la gueule ou aultre endroit. Aprés dore le d’or fin le plus
uniment qu’il te sera possible trois ou quattre ou cinq fois
& jusques à ce que ton or puisse avoir l’espesseur d’un papier
ou aultre suffisante, & toutes les escailes se monstreront tousjours
esgalles. Aprés mects le dans l’eau fort bonne, qui par ce trou
corrodera le billon & l’or demeurera creux & legier & admirable.