Making and Knowing
A minimal edition of BnF Ms Fr 640

[TOC] | [translation]

- - - - - folio image: p119v - - - - -

Facon dacoustrer laspalte spat

Il se trouve en terre en Allemaigne de couleur de plastre cuit
faict a longs filets fort doulx a manier Et pourcequil est
mesle de terre et ordure On le pile grossierement & on en faict des
pelotes layant pour ces effect destrempe en eau de sel armoniac
de telle composition quil ta este dit cy dessus On mect recuire ces
pelotes a foeu de la fornaise des potiers Puys on le destrempe
encores en mesme eau La terre et le grossier et ordure vont au
fonds et le pur aspalte qui est leger & douls et maniable comme
farine destrempee adhære avec leau & va a la superficie
en brouillant leau laquelle trouble se vuide en un vase
a part Ayant reside on vuide leau par inclination ou
bien on la retire avec un esponge Et le pur aspalte demeure
au fonds Desseiche le & lemploye en chassis estant
humecte deau de sel armoniac et lessaye au chassis dans
lequel sil se retire estant recuit ou desseiche cest adire
quil le fault encores recuire a bon feu et le rougir Ainsy
pour medailles et choses plattes Sers toi de cestuy cy car
cest le plus parfaict de tous pour or argent cuivre plomb letton
& estaim Car il soubstient le feu & se rougist quand il est
besoing sans se corrompre Et tant plus il sert tant plus
il est b meilleur & ne se gaste point Au commancement il est
blanc & servant il vient gris Touteffois prens garde de
mectre a part celuy qui a servi pour gecter plomb & estain
& letton Car lor si aigriroit & ni viendroit pas bien Et
pour mieux faire tu pourras mectre a part diceluy pour
servir a chasque metal

at left top margin

Voy gesnerus
de lapidibus

at left top margin

Il endure
dix ou douze
gects sans se
corrompre
il soubstient
le foeu & se
rougist il est
propre pour
tous metaulx
Il est si tenace
que pour peu
que le chassis
soict canelle
il tient

at left middle margin

Le spat ne
faict presque
poinct de
prise bien quil
soit recuit
& quil soit
espece de plastre
cru il se rompt
aysement avecq les
doigts

Excellent secret pour mouler creus
et fort subtil en or fin

Jecte avec ton sable susdict ton animal et lesarde ou aultre
chose avec argent de billon & il viendra fort net E Mays
advise de le mouler creux ou dy laisser a tout le moins un trou
dans laquelle ou aultre endroit Apres dore le dor fin le plus
uniment quil te sera possible trois ou quattre ou cinq fois
& jusques a ce que ton or puisse avoir lespesseur dun papier
ou aultre suffisante & toutes les escailes se monstreront tousjours
esgalles Apres mects le dans leau fort bonne qui par ce trou
corrodera le billon & lor demeurera creux & legier & admirable