45r - - - - - Charger arquebus de dragée
Figure
Il fault faire un tuyau de buys long comme la largeur de 4
ou 5 doigts qui soict justement creusé selon la bouche de ton canon,
de la forme representée par D A. Puys, ayant taillé du papier,
de la fort comme de grands livres imprimes, de la forme de D, large
aultant que tu vouldras faire longue une cartuche, entourne le
papier aultour du baston B & au bout, où la poincte F se retrouvera,
replie tout aultour ledict papier, & ta cartuche sera formée.
Mays pour mieulx unir son fonds, remects la dans le tuyau A, puys
mects dans icelle le baston B, et par l’aultre bout du tuyau, qui est
marqué G, mects le baston C & frappe pour apiler & acacher le bout
replyé de ta cartuche, puys oste la & la charge. En ceste mects trois
ou 4 drageons ou larmes. Puys, avecq un portepiece marqué E,
qui soict du qualibre de ton arquebus ou pistole, frappe des pieces
rondes sur de la carte ou feultre ou toile cirée, et mects ceste
piece ronde dans ta cartuche, et la pousse jusques sur les drageons
avecq le baston B. Aprés, d’aultres drageons 3 ou 4, puys une piece
ronde. Et fays ainsy jusques à ce que la cartuche soict plene, puys
la mects dans ton arquebus. Si tu veulx que ta dragée s’escarte bien tost,
fais les pieces rondes de papier. Si tu veux qu’elle porte plus loing
sans s’escarter, fais la piece de carte. Si tu veulx encores plus loing,
fais la piece ronde de toile cirée, ou bien de cuir ou feultre
& par dessus une piece de toile cirée. Et si tu fais la cartuche
mesme de toile cirée ou papier ciré, il portera cent pas & fera
grande faulcée, & la dragée, ne s’escartant gueres, fera ouverture.
Mays si tu fais ta cartuche de toile cirée ou matiere plus forte
que de papier, il ne la fault pas faire si longue du carré venant à
la pointe comme D, car c’est assés qu’elle fasse deux tours. #En ceste
sorte la dragée ne s’escarte gueres & faict grande faulcée contre une
porte, corps de cuirasse et aultres.
at left bottom margin
# comme DH.