168r - - - - - [continued]
Figure at left top margin
cheville qu’on mect dans la lumiere, & puys, avecq une corde
entournée au bout d’un baston, on donne feu & promptement on
se retire à couvert. Les petits mortiers de 16 ou 17 lb
s’atachent promtement avecq une courte cheville crochue faicte
en vibrequin, & s’il est de bonne ligue on y peult mectre le
foeu avecq la main, comme faict on bien aulx mortiers de 27 lb,
mays lors on n’y mect que trois lb de pouldre. Il fault
bien que la porte soict forte si le mortier de dix sept lb
ne la faict saulter. Aulcuns pour une porte de paysant
usent des clochettes que portent les bœufs ou mulets.
Aultres chargent deux canons de pistoles & avecq un
guimbelet & une fisselle les attachent la gueule contre la
porte. Si les mortiers sont bons & ne s’esclattent point,
ilz ne font que reculer et ne peuvent fayre mal estant à
costé.
A. C’est une petite cheville crochue comme un going de porte & faicte en
viron par un bout pour attacher incontinent un petit mortier à oreille
de quinze ou xvii lb pour une commune porte ou fenestre.
B. C’est un petit mortier à oreilles.
C. C’est un gro commun mortier de 27 ou 30 lb percé par la culasse,
par où passe une grosse cheville de fer à bouton par un bout
& faicte a viron par la poincte pour attacher promtement le
mortier contre une porte qui n’aura ne sera poinct couverte de lames de fer.
D ce sont platenes de cire, de liege & de boys pour charger le
mortier & bien sceller la pouldre.
E Ce Fourchette de fer faicte en forme de tenaille, de la haulteur
d’un homme, pour poser promtement le mortier sans cheville. Elle
doict estre de fer doux affin que ses branches plient aysement,
si besoing est, pour s’acommoder à la haulteur ou largeur de la
porte.
F. C’est une aultre fourchette de fer de mesme haulteur, qui
apuye la fourchette faicte en tenaille & soubstient aussi le
mortier et avecq sa griffe basse empeche que la tenaille
ne recule.
[continued]