166r - - - - - Pour la boutique
Si quelque chose est obmis: le moissonneur pour laisser quelques
espis n’est pas repris.
Si quelques artisans se plaignent qu’on descouvre les secrets
des arts et que les deesses eleusines se plaignent comme à N.
pytagorien de ce que on ha divulgué leurs mysteres, excuse
toy sur le dire des anciens Hebrieulx recité par Josephe.
Comme la poulle cherche curieusement, parmy les bourriers
dejectés d’une mayson, une miette ou quelque grain qu’elle
depart à ses poulsins, ainsy aulx orphelins distribue on
ce qui a esté cherché parmy les arts estimés villes & abjectes.
Table de Cebés, oysive. Mays La Boutique represente
toutes choses actives.
Si le zelotype reprend que ce sont choses ramassées & prinses d’aultruy,
responds que, puys que Nullum est jam dictum quod non dictum aut factum
sit prius & que on tient que dans l’espace de mille ans tous les arts ont
esté inventés, que tu ne penses pas pouvoir inventer quelque chose nouvelle, mays bien retrouver de nouveau les livres de Numa ensepvelis
& de long temps incogneus & oubliés, pour les publier à ceulx qui les ignorent;
que le jour precedent est praecepteur du subsequent, par ainsy que tu as
eu besoing d’aprendre des praecedents pour enseigner les subsequents. Les
Latins ont prins des Grecs, comme Ciceron de Platon & Vergile d’Homere.
Aule Gelle Valere Maxime n’ha faict qu’un reveil de divers autheurs
desja escripts. Tite Live, son xxiiii libvre du 2 ou 3e de Polybe.
Serapisestoict estimé entre les Aegiptiens inventeur de l’agriculture, & touteffois
Cerés entre les Siciliens. Pythagore & aultres de Tyanée ont aprins par
leurs peregrinations les disciplines desquels ilz se sont dicts inventeurs
en leur pays. & le tisserant ne sera il poinct dict avoyr faict la toile
ou l’estoffe precieulx, encores quil n’aye tainct & retors, devidé & praeparé
les bobines & pelotons? Le masson n’avoir faict la maison, ains
seulement ramassé les pierres toutes faictes? Apollo a Chirone medicari
didicit & tamen deus medicinae habitus. Homerus Orphei poema
imitatus est, nam cum Orpheus sic prius exorsus esset, ‘Iram cane dea
Cereris frugiferentis’, ita reddit Homerus, ‘Iram cane dea Pelidae
Achillis’. In Justino martire, Circa princip.