166r - - - - - Pour la boutique
Si quelque chose est obmis le moissonneur pour laisser quelques
espis nest pas repris
Si quelques artisans se plaignent quon descouvre les secrets
des arts et que les deesses Eleusines se plaignent comme a N
pytagorien de ce que on ha divulgue leurs mysteres Excuse
toy sur le dire des anciens hebrieulx recite par Josephe
Comme la poulle cherche curieusement parmy les bourriers
dejectes dune mayson une miette ou quelque grain quelle
depart a ses poulsins Ainsy aulx orphelins distribue on
ce qui a este cherche parmy les arts estimes villes & abjectes
Table de cebes oysive Mays la boutique represente
toutes choses actives
@ Si le zelotype reprend que ce sont choses ramassees & prinses daultruy
responds que puys que nullum est jam dictum quod non dictum aut factum
sit prius & que on tient que dans lespace de mille ans tous les arts ont
este inventes que tu ne penses pas pouvoir inventer quelque chose nouvelle
Mays bien retrouver de nouveau les livres de Numa ensepvelis par
& de long temps incogneus & oublies pour les publier a ceulx qui les ignorent
Que le jour precedent est praecepteur du subsequent par ainsy que tu as
eu besoing daprendre des praecedents pour enseigner les subsequents Les
Latins ont prins des grecs comme Ciceron de platon & Vergile dhomere
Aule gelle Valere maxime nha faict quun reveil de divers autheurs
desja escripts Tite Live son xxiii lb. du 2 ou 3e de polybe.
Serapis estoict estime entre les Aegiptiens inventeur de lagriculture & touteffois
Ceres entre les Siciliens Pythagore & aultres de Tyanee ont aprins par
leurs peregrinations les disciplines desquels ilz se sont dicts inventeurs
en leur pays &. Le Tisserant ne sera il @ poinct dict avoyr faict la toile
ou lestoffe precieulx encores quil naye tainct & retors devide & praepare
les bobines & pelotons Le masson navoir faict la maison Ains
seulement ramasse les pierres toutes faictes Apollo a Chirone medicari
didicit & tamen Deus medicinae habitus Homerus orphei poema
imitatus est Nam cum Orpheus sic prius exorsus esset Iram cane deam dea
Cereris frugiferentis Ita reddit homerus Iram cane dea Pelidae
achillis In Justino martire circa princip.