165r - - - - - Reparer
Si en ton gect il survient quelque petit trou, racoustre le
avecq de la cire gommée à esbaucher qui soit noire ou grise.
Laque
Si estant broyée tu la laisses seicher sans la tenir en l’eau,
elle dessechera & tu auras aultant de peyne à la broyer comme
au paravant. La
Tendre un portrait en toile
S’il est foulé & plissé en le roulant, mouille le par
derriere avecq une esponge mouillée & tu le tendras fort
uny sans le gaster.
Plastre à mouler
Quand il est long à fayre prise & seicher, c’est signe qu’il est
trop gras & humide, qui est ce qui le faict retirer au foeu &
se fendre, d’où viennent les baves. Celuy qui se tire en terre
maigre est le meilleur. Il ne fault pas long temps garder les
moules de plastre gras, car ils semblent la terre grasse qui en
se sechant d’elles mesmes se fend. Le mieulx est de les recuire
bien tost aprés qu’ilz sont faicts & gecter. Le bon plastre se garde
long temps en
moules.
at left middle margin
Il le fault
bien huiler, car
il est plus difficile
à se separer les
deulx moictiés des
moules que
quand il est
meslé.
Sang de dragon
Il se peult imiter avecq la laque, qui le surpasse en beaulté
si d’icelle destrempée à huile, tu en glaces sur l’or ou argent.
Destrempée à vernis, elle se meurt.
Reparer serpents et lesards
Tu pourrois bien faire des poinçons selon la forme de
leurs escailles & en faire de plus grands & plus petits
selon la forme du col, du corps & de la queue. S’il y ha
quelque chose rompu tu le peulx hanter avecq de petites pieces
poinctes de fil de fer ou d’acier & coller avecq colle de poisson
& puys couvrir tout avecq cire grise ou noire. Mays il fault
laisser seicher la colle un jour sans y toucher.