164v - - - - - Moules
À ceulx qui dans lesquels il fault brusler quelque
chose, et qui ne s’ouvrent point plustost qu’estre
recuits, on ne faict point de gect qu’il ne soit
recuit. Aulx grands moules ausquels le gect est grand
et ample, il fault que le gect soict fort encoché & raturé
affin que le poix du metal n’aille point de force. Ilz ne
font gueres de baves s’ils sont pressés. Mays plustost que
les presser, mects entre eulx et la presse des pieces
de feutre mouflé & espés qui n’est encores gueres foulé,
car il remplist les concavités & garde le moule de se fendre.
Les crampons se doibvent mectre plustost que le recuire
ou deseicher.
at left top margin
Quand la terre
de laquelle tu fais
la platene de terre
pour disposer ton
animal est trop molle,
les poinctes que tu
y mects s’enlevent
& deffont aysement
quand tu gectes le
sable, & ainsy le
moule se gaste
et le plan se
deffaict. Doncq
quand tu cognoistras
que ta platene
sera trop tendre
& molle, espant
dessus de la cendre
chaulde & soufle
avecq le souflet.
Sable
S’il n’y ha poinct assés de bon alum de plume ou de crocum,
il se fend aisement au foeu. Mays s’il en est meslé comme il
apartient, il soubstient. Il se cognoist bon quand, estant chault
aprés le gect, il s’abreuve incontinent d’eau quand on l’y
trempe & se rend romp facillement pource que l’alum & le crocum
le rendent spongieulx. Au contraire le mauvais sable, qui n’est
que de plastre & brique & peu meslé d’alum, se rompt aisement
au foeu & s’endurcist dans l’eau.
Gecte s’il est possible tout à un coup.
Moules
Encores que tu gectes en plomb, les moules veulent estre
bien desseichés, mesmement quand ils sont grands, et les
fault rougir dehors & les tenir en continuelle chaleur,
jusques à ce qu’ilz ne fument plus par dedans. Ne les
mets pas à recuire à diverse foys, mays continue
quand tu as commancé. Et ne les mects pas à refroidir
au froid Avecq car ilz se fenderoient, mays laisse
les atiedir prés du foeu, & comme ilz sont encores en telle
chaleur que tu as cy devant remarqué mectant le doigt au
trou gecté. Et quand le moule est grand, il veut plus
de temps à recuire & deseicher, & fault gecter plus chault.