164v - - - - - Moules
A ceulx qui dans lesquels il fault brusler quelque
chose et qui ne souvrent point plustot questre
recuits On ne faict point de gect quil ne soit
recuit @ Aulx grands moules ausquels le gect est grand
et ample il fault que le gect soict fort encoche & rature
affin que le poix du metal naille point de force Ilz ne
font gueres de baves sils sont presses Mays plustost que
les presser Mects entre eulx et la presse des pieces
de feutre moufle & espes qui nest encores gueres foule
car il remplist les concavites & garde le moule de se fendre
Les crampons se doibvent mectre plustost que le recuire
ou deseicher
at left top margin
Quand la terre
de laquelle tu fais
la platene de terre
pour disposer ton
animal est trop molle
les poinctes que tu
y mects senlevent
& deffont aysement
quand tu gectes le
sable & ainsy le
moule se gaste
et le plan se
deffaict Doncq
quand tu cognoistras
que ta platene
sera trop tendre
& molle espant
dessus de la cendre
chaulde & soufle
avecq le souflet
Sable
Sil ny ha poinct asses de bon alum de plume ou de crocum
il se fend aisement au foeu Mays sil en est mesle comme il
apartient il soubstient Il se cognoist bon quand estant chault
apres le gect il sabreuve incontinent deau quand on luy
trempe & se rend romp facillement pource que lalum & le crocum
le rendent spongieulx Au contraire le mauvais sable qui nest
que de plastre & brique & peu mesle dalum se rompt aisement
au foeu & sendurcist dans leau
Gecte sil est possible tout a un coup
Moules
Encores que tu gectes en plomb les moules veulent estre
bien desseiches mesmement quand ils sont grands et les
fault rougir dehors & les tenir en continuelle chaleur
jusques a ce quilz ne fument plus par dedans Ne les
mets pas a recuire a diverse foys Mays continue
quand tu as commance Et ne les mects pas a refroidir
au froid Avecq car ilz se fenderoient Mays laisse
les atiedir pres du foeu & comme ilz sont encores en telle
chaleur que tu as cy devant remarque mectant le doigt au
trou gecte Et quand le moule est grand il veut plus
de temps a recuire & deseicher & fault gecter plus chault