164r - - - - - Gect
Quand tu fais le gect de quelque animal delicat
comme d’un serpent, fais qu’il vienne du costé du ventre
& soubs la queue, car de costé il n’y ha que des
ligne droictes, qui sont aysées a reparer plus beaucoup
que le dos, qui est le plus en veue & plus marqué.
Reparer les baves
Les ayant doulcement ostées avecq la poincte du
chaple ou du burin, racle les avecq l’aile du burin,
ou doulcement avecq une petite lime, & frotte de charbon
de saule & les petites broisses. Continue aussy les
lignes interrompues par les baves.
Argent plombeus
Il se dechet beaucoup, à cause que le plomb qui
y est meslé le travaille comme en la copelle et le faict
saulter en petits grains aulx bords du creuset
& sur le charbon qui le couvre. Il est aussy gras,
et par ainsy il est bon de fondre tout argent
monnoyé, comme de realles & aultres, & le mectre en
lingot plustost que le fondre pour gecter les
lesardes & animaulx, car il vient mieulx. J’en ay
moulé net comme le principal ainsy une petite
vipere d’argent, et fis la ligue de 4 realles
de 20 sols d’Espaigne & une piece de xx sols de
France.
Soufler
Quand tu fonds de l’argent & de l’or, ne soufle pas fort
& de violence, pource que, le charbon se tassant, le crusol
s’abaisseroit & l’arg se pourroit renverser. Mays quand
ton moule sera prest, lors soufle fort pour bien eschaufer
l’argent ou l’or. Tous deulx, estant fondus, veulent estre
soufflés par dessus avecq un petit souflet, mesmement l’or, car cela
leur oste leurs fumées & les adoulcist.