164r - - - - - Gect
Quand tu fais le gect de quelque animal delicat
comme dun serpent fais quil vienne du coste du ventre
& soubs la queue Car de coste il ny ha que des
ligne droictes qui sont aysees a reparer plus beaucoup
que le dos qui est le plus en veue & plus marque
Reparer les baves
Les ayant doulcement ostees avecq la poincte du
chaple ou du burin racle les avecq laile du burin
ou doulcement avecq une petite lime & frotte de charbon
de saule & les petites broisses Continue aussy les
lignes interrompues par les baves
Argent plombeus
Il se dechet beaucoup a cause que le plomb qui
y est mesle le travaille comme en la copelle et le faict
saulter en petit grains aulx bords du creuset
& sur le charbon qui le couvre Il est aussy gras
Et par ainsy il est bon de fondre tout argent
monnoye comme de realles & aultres & le mectre en
lingot plustost que le fondre pour gecter les
lesardes & animaulx Car il vient mieulx Jen ay
moule net comme le principal ainsy une petite
vipere dargent Et fis la ligue de 4 realles
de 20 sols despaigne & une piece de xx sols de
france
Soufler
Quand tu fonds de largent & de lor ne soufle pas fort
& de violence pourceque le charbon se passant le crusole
sabaisseroit & larg se pourroit renverser Mays quand
ton moule sera prest lors soufle fort pour bien eschaufer
largent ou lor Tous deulx estant fondus veulent estre
souffles par dessus avecq un petit souflet Mesmement lor Car cela
leur oste leurs fumees & les adoulcist