163r - - - - - Parfumeur
Ils mectent volontiers moictié d’ambre & moictié musc & fort
peu de civette, pource que l’ambre emporte tousjours la
principalle senteur sur le musc.
Pour espargner l’ambre, ilz mectent volontiers aulx couches
blanches un peu de musc, qui donne senteur
plus violente. Mays pour oster ou cacher la noirceur
du musc, ils y mectent un peu d’amydon d’Angleterre,
qui est parfaitement blanc.
Pour parfumer d’ambre blanc à la façon de
Portugal, prens un huchau d’ambre bien esmenuissé.
Et ayant mis dans une petite escuelle d’argent une cuillere
d’huile de fleur, ou en default d’huile de ben,
sçavoir est une cuillere d’argent qu’on sert à table,
mects y ton ambre gris & pose tout sur foeu lent,
et il se fondra bien tost, si l’ambre est bon, & n’y demeurera
rien grumeleux. Estant le tout fondu, mects y la
grosseur d’un pinon de civette, & fais fondre & mesler
bien ensemble. Aprés prens tes gands bien lavés
& bien essuicts, & trempant fort legerement le bout
du doigt dans le bort de l’huile, estants sur le
gand peu à peu & avecq patience, & frotte le gand
entre les mains, & suis les doigts & les costures l’une
aprés l’aultre. Et laisse seicher. Aprés resuicts
comme devant jusques à ce que l’ambre soict tout posé.
Eau de vye
Elle est excellente à fayre mouler net, de sorte qu’au lieu
où tu n’en mectras point, le sable communement s’attaquera à
la figure. Mays elle veult estre de trois passes. Et pource que
elle ne prend pas aysement sur les choses huilées, je croy
qu’il seroit bon d’en mectre parmy l’eau dans laquelle tu
destrempes ton sable.