162v - - - - - Peschers
Pourceque ils jectent & florissent des premiers & par
ainsy sont atrapes de la ch gelee On les deschausse
lhiver affin que lhyver le froid les retarde Et que le
florissant plus tard les fleurs viennent a proffict
Oliviers
En espaigne on les deschausse lhiver & leste on les
chausse fort de terre.
Pied de Butor
Pour le mouler il est mieulx de luy estendre bien les
doitgs & ongles sur quelque chose plaine & le laisser
ainsy seicher quelques jours pourceque en seichant
les escailles se monstrent plus rudes & les nerfs & tendons
deviennent plus aparents Et par ainsy le pied moule
sera plus artiste
Moules de choses qui ne sont
en despouille
Les animaulx qui ne sont en despouille ne se peuvent
mouler qua deulx moules qui ne se doibvent ouvrir quapres
quils sont bien recuits & que lanimal enclos ne soict bien
brusle Les animaulx qui ont os ou escaille qui ne se
reduisent en pouldre ains demeurent en lopins calcines
ne sortiront jamays par le gect quelque soufler quon
fist ne quelque argent vif quon y mist ou un tuyau
de plume en moulant pour servir de gect Cest pourquoy
on moule a deulx moicties Affin que le moule souvrant
apres avoyr este recuit la chose bruslee se puisse bien
nettoyer Mays advise de le bien laisser froidir affin
quen ostant les crampons estant chault et lors quil est plus
frangible quelque chose ne se rompe Pendant quil est chault
la crouste & cendres quil laisse & qui adhære au moule sostera
mieulx estant froid Note aussy que du coste du moule bas
quand tu recuits lanimal qui bouille y laisse une crasse Et
pourceste occasion on marque toujours le moule ou est le dos
de lanimal affin quen recuisant il soit en hault & dessus & que par
ce moyen il soict plus net