161r - - - - - Praeparation du sable pour chassis
Aprés que ton sable de noyau dalu de gip de lateribus & alumine
jameni t’a servi en noyau, rassemble les lopins des moules,
romps les sur une longue table avecq un gros billot affin de
les bien pulverisesr, et pour mieulx tamise le subtilement. Mects les dans des pots au four du tuilier
ou four à pain plusieurs fois lors qu’il est bien allumé, affin qu’ilz
viennent bien rouges. Estant refroidis, repile les si besoing est, et tamise. Aprés
mects le dans une vaisse ou semal ou vaisseau net capable; et le
destrempe avecq eau claire; et le broye & remue avecq un gros
baston, jusques à ce qu’il soict bien destrempé & lavé & que les
ordures aillent sur la superficie de l’eau; & continue de le remuer
ainsy, comme le gip mat qu’on praepare pour dorer d’or bruny @, cinq ou
six jours, jusques à ce qu’il ne soict aulcunement grumeleux. # nota Et à
chasque fois que tu le remueras, laisse le reposer & vuide
l’eau claire qui sera par dessus, par inclination ou avecq une
escuelle ou esponge, et remets d’aultre eau claire, & ainsy
lave & remue le jusques à ce qu’il soict bien subtil & repurgé
de toute ordure. Nota #. Aprés laisse le un peu essorer et secher et en fais
des pelotes destrempées en eau de sel armoniac, et estant ainsy
d dessechés l, mects les à recuire à grand chaleur dans un
four de reverberation où elles soient bien rouges, bon espace
de temps. Estant recuites de ceste sorte, pulverise les & essaye
en chassis de mouler quelque chose, ayant humecté ta
pouldre d’eau de sel armoniac. Et fays recuire & rougir
le chassis, & si ton sable se retire, Il le fault encore
pulveriser & destremper en eau de sel armoniac, le reduire
en pelotes & le recuire & rougir, & continuer tant de foys qu’il
ne se retire point au chassis quand tu le rougiras. Le
principal est qu’il soict bien recuit, car aultrement le sel
armoniac ne se calcineroit pas bien & rendroit le sable grossier,
& pour ceste cause il n’y fault pas trop de sel armoniac.
at left top margin
#
Nota qu’il fault,
premierement
que de le secher,
destremper le tout
et le vuider le
liquide en un aultre
vaisseau commun,
quitant le
litarge, affin que
les pierres & terre
demeure au fond
aprés. Il fault
le laisser reposer
& vuider l’eau par
inclination & le
laisser secher.
at left bottom margin
nota