160r - - - - - Presse pour les grands moules
Figure
Figure at right top margin
Ce sont deulx lamines de fer attachées par quattre petits
piliers de fer, de telle sorte touttes foys quelles la superieure puyssent librement
jouer & courir le long des piliers, & que celle de bas soict
arrestée. Au bout des piliers s’arreste une croix de Sainct André,
de fer, au milieu de laquelle est une vis qui sarre les lamines
contre les moules qui sont entre deulx.
Ou bien, pour les petits moules, on fait un chassis, & ayant
mis les moules entre deulx lames de fer, on pose le sarre dans
le chassis avecq des coings.
Les grandes presses de bois faictes à vis, oultre ce qu’elles
sont lourdes à mectre auprés de la forge pour gecter, on ne peult
pas cognoistre quand elle sarrent trop, & bien souvent elles
rompent le moule.
at left top margin
La vis est rivée
à cest estrier qui
est cloué sur la
platene de dessus,
& par ce moyen
la haulsse & la
presse.
Sable pour fleurs
S’il est gecté espés, il agrave trop les fleurs & les reserre & reduit
comme amassées ensemble. Advise doncq de le destremper cler, & fort
soufler plustost que la fleur ne soict couverte. Gecte au costé du
moule. Et destrempant le sable, il ne fault seulement tourner la
pallette, mays battre le sable dans l’eau comme si tu battois
de la glaire d’oeuf.