159v - - - - - Nettoyer limes
Quelques fois elles s’engraissent & par le moyen de la
graisse le plomb, qui est gras de soy mesme, ou aultre
limaille s’i attaque. Et tu les pourras nettoyer ou avecq
un charbon chault ou avecq une grattebroisse de fil
de laitton.
Oeillet
Il se moule comme la rose, soulcy & toutes aultres
fleurs, ainsy que dict est, sçavoir les fleurs à
moule entier & toutes les foeuilles, si tu veulx,
à deulx moictiés pour les raporter par souldure
pour la voye plus asseurée, combien que tu les
pourroys mouler ensemble en moule clos. J’en ay
gecté un qui est fort bien venu. Mays il fault le sable fort
cler & soufler fort.
Figure at left middle margin
Moules
Fais que des deulx endroicts ilz soient, es s’il est possible,
aultant espésseur l’un que l’aultre, affin que bien esgallement
ilz se puissent recuire. Quand tu moules quelque animal
qui se doict brusler tu comme escrevisse, tu ne le peulx ouvrir
pour le nettoyer & fayre le gect qu’il ne soict recuit.
Et quand ils sont une foys recuits, ne les garde gueres
sans gecter, car ilz se rendent relants & humides, & le
moule se deffaict & perd sa force.
at left middle margin
La partye où est
le dos de l’animal
est communement plus espés.
Plastre seul
Le plastre recuit en pierre craint se deffaict en l’eau, mays
celuy qui est recuit & pulverisé premierement et puys recuit ne la
craint point. Ains s’y endurcist s’il est bon, comme celuy de Parys &
d’Espaigne qui est dur en pierre comme est celuy qui croist en terre
maigre & seche et qui semble au sel blanc. Les Allemands en font
des statues aulx fontaines qui ne se gastent point, mesmement estant
vernissées, ains il s’endurcist en l’eau. Quand il est seul & point
meslé, il ha bien plustost faict prise qu’aultrement. Il fault huiler
fort legerement tes formes, soient de metal ou pierre, aultrement il ne
despouilleroit point. Et touteffois que tu huiles, il fault le destremper
avecq eau chaulde. Et quand il aura faict prise & sera bien
refroidy, il le fault tremper dans l’eau quelque fois froide, mays
s’il refuse de s’ouvrir, en eau chaulde & quelque fois en eau bouillante.
at left middle margin
Quelque fois il
fault mesme faire
bouillir le moule
dans l’eau chaulde,
comme quand tu as
moulé quelque cire
que tu craignes n’estre
pas bien en despouille.
at left middle margin
L’eau froide faict
retirer l’huile à la
superficie du plastre
qui l’ha succée, & ainsy
il se despouille.