158v - - - - - Couleurs pour les feuilles vertes
On les painct communement à huile pource que les couleurs
à destrempe n’ont point de tenue. Pour fleur de soulcy,
le minium peu broyé pour aulcuns, & pour d’aultres qui
sont plus jaulnastres, un peu de massicot parmy.
Pour vert, le vert de gris a fonds & est trop obscur.
Si c’est un vert jaulnastre, tu peulx mesler avecq
le verdegris, un peu d’ocre jaulne & de scudegrun.
Si le verd est obscur, mects parmy du charbon
de noyau de pescher, qui faict un v noir verdastre,
comme le noir d’os de pied de bœuf faict bleuastre.
Et ainsy, par jugement & discretion, mects la couleur
sur la fleur ou foeille naturelle pour voyr
si elle aproche bien. Mays couche la fort clere, pour ne
couvrir pas les traicts de l’ouvrage.
Grands moules
À cause du grand poix du metal, ilz veulent
estre mis dans une presse affin qu’ilz ne s’ouvrent
pas.
Fumée de chandelle
Elle faict venir plus net, & encores qu’elles soict un peu espesse,
elle ne tient poinct de lieu pource qu’elle n’ha poinct de
corps. J’ay ainsy parfumé mes moules de noyau pour
l’estain & plomb, et ay gecté dans le moule froid,
mays auparavant bien deseiché, et est venu fort net.
Il est vray que le plomb meslé de moictié d’estain,
pource que la medaille estoit espesse, estoict fort chault.
Gect
Encores que Si la medaille est fort espesse, ne luy donne
pas pour cela le gect aussy espés. Il suffict que le
gect aye la moictié de son espesseur. Mays si elle
est tanvre, donne luy le gect de son espesseur. N’oublie pas de
fayre des souspirails au gect, ou communement la matiere soufle.
at left bottom margin
N’oublie jamays
d’huiler le gect de
cire quand tu moules
des herbes ou
fleurs, aultrement
il se rompt & ne
se peult pas
retirer.