158r - - - - - Mercure dans les moules à nettoyer
Advise bien que le moule soict bien froid plustost que soufler
pour faire sortir la cendre, et y mectre apres le ☿ pour
achever de nettoyer. Car si le moule est chault, le ☿ penetre
dedans & cherche des conduicts en s’envolant, & laisse un odeur
de soy, qui aigrist tellement l’estain ou aultre metal que tu
y gecteras, qu’il se rompra en y touchant le moings du monde.
La chaleur aussy du moule retient de petits grains de ☿,
qui font grumeleus &, se retirant au bord des foeuilles moulées,
s’y joignent & font les foeuilles frangibles. Le ☿ nettoye bien
la cendre, mesmement aulx choses plattes où il n’y ha pas traicts
delicats qu’il puisse rompre par sa poisanteur. Et par
ainsy, si tu peulx nettement gecter sans y en mectre, ne t’en
sers poinct. Mays s’il est besoing de l’employer, mesle
ton sable de crocum affin qu’il soubstienne bien le foeu.
Et aprés avoir mis le ☿, evacue le en renversant la bouche
du moule en bas. Apres recuits legerement le moule, affin
que le ☿ s’en aille du tout. En ceste sorte, j’ay gecté une
branche de provenche, foeilles & fleurs, fort net, ayant dans
la fleur une branche de fondu au dos de la fleur
at left bottom margin
Recuits bien
rouge le
moule plustost
q qui gecter,
affin que le
☿ s’exhale
bien.