157v - - - - - Cendre dans les moules
Il fault laisser froidir le moule plustost que
soufler pour fayre sortir les cendres. Car quand
le moule est chault, elle adherent contre luy & estant
froid, plus aysement s’en separent & s’en vont en souflant
avecq le vent en vapeur.
Mouler un oiseau
Il fault luy donner son plant. Et pour ce faire, le mectre
de costé sur la platine d’ardille, et cacher dans icelle
& enfoncer la moictié dudict oiseau, affin qu’il ne mostre qu’une
jambe & un pied, puys tu l’oindras de beurre pour faire
tenir la plume couchée, en fin dhuile d’eau de vye. Et
puys gecte. Et ayant faict prise, nettoye & descouvre
ce qui en aura besoing. Aprés moule l’aultre costé
de mesme sorte. Mays pource que les pied estants d’os
malaisés à brusler, & qui ne se pourroient point nettoyer,
ne par argent vif, Si ne aultre moyen, si le moule ne
s’ouvroit, descouvre le dessoubs des pieds & l’orteil ou petit
doigt du talon & moule d’une piece à part. Fais recuire,
& ouvre ton moule, & nettoye les os. Les pieds communement
demeure foibles pour soubstenir la masse de l’oiseau
massif. Et pour ceste cause on adapte un fil de fer
dans le moule des pieds, qui passent dans le corps plustost
que gecter, ainsy ilz se renforcissent. Aulcuns moulent
les aisles en chassis. Aultres moulent la teste & lesdictes aisles
à part en noyau, puys les raportent & reparent pour esbaucher
premierement une forme qui soict roide, & soubstiene le sable
destrampé.
at left middle margin
Ils s’escorchent
& remplissent
le toile cottonée.
& pour mieulx
il fault adouber
à la façon des
corroyeurs, affin
qu’ilz ne perdent
point la plume.
leste. Ladoub
est alum & paste
de farine.
Pour faire h… un f…rs
Prenez un chausson du pied droidt qui ait esté porté et le faictes
tremper en eau, et de l’eau qui en sortira la faire boyre au mesme
ou au autre et verrez merveilles.