156r - - - - - Mouler promptement et reduire un
cave en relief
Tu peulx empraindre de cire coloree le relief dune
medaille & tu auras un cave dans lequel tu pourras gecter
en noyau un relief de ton sable sur lequel tu feras un cave de plomb
ou destain dans lequel tu gecteras un relief de cire
Et puys sur ceste cire tu feras ton moule en noyau cave
pour y gecter le relief dor & dargent ou tel aultre
metal quil te plaira Mays pour advancer besoigne
si tu as haste fais le premier empraint & cave de mie de
pain preparee comme tu scais qui moulera fort net Et la
dedans gectes y de la cire fondue qui te rendra un beau
relief sur lequel tu feras ton noyau
Ouvrage dor fort leger et creux
Gecte un lesard ou telle medaille quil te plaira dargent
bas comme de billon Apres dore la legerement Et comme la premiere
doreure sera faicte & essuite au foeu Advive grattebroisse &
fais une aultre charge de doreure legere comme la premiere
fois & fais ainsy trois ou quattre fois ou dadvantage selon
lespesseur que tu vouldras donner Et puys ayant faict un
petit pertuis au lieu moins en voeue Mects ton ouvrage dans
de bonne eau fort qui penetrant par le pertuis a largent
le mangera tout sans endommager lor De sorte que tu auras
un lesard creux iusques aulx ongles ou aultre ouvrage si leger
quen souflant tu lagiteras Mays advise de ne charger pas
dor amalgamé tout a un coup ou qui aye gueres despesseur
a chasque fois pourceque cela boucheroit les petits traicts
Mays y procedant comme dict est legerement & a plusieurs fois et nettoyant bien @
tu feras bien
at left middle margin
Affin que leau
fort mange
mieulx il fault
gecter gecter
dargent bas
Ciseller
Le plomb est si gras & tendre quon ny peult fraper hardiment
& fault avoyr la main fort legere Les aultres grands metaux
sont plus ayses Avecq un burin apelle longlet tu fais & resuits
les traits les plus delies Avecq le burin ordinayre a tailler les plus
larges Et avecq le chaple tu ostes les grosses baves Et avecq les
ciseaulx tu adoulcis lasperite des traicts tu aplanis tu releves un traict