155v - - - - - Rose
Pource que la fleur espanouye est vague & ha ses
foeuilles confuses & entournees en diverses facons elle
ne se monstre poinct belle quelle ne soict paincte & daultant
aussy quelle ha pois on fir que la queue destain qui
est aigre & subtile ne pourroict pas susporter On moule
la fleur de la rose seule & apart Luy faisant le
gect grosset affin quelle vienne b mieulx Puys on
couppe ce gect au ras de la queue du bouton dans
lequel apres on hante & soulde une tige de fil de letton
a laquelle aussy on soulde les foeuilles Mays pourceque
lestain estant ainsy tanvre est fascheux a soulder et se
peult fondre quelque foeuille Et quaussy les fleurs
gectees & principallement la rose ne sort pas belles sans estre
painctes On ne prend poinct la peine de soulder Mays on le
hante les pieces a raporter & on les colle avecq de la colle
de poisson qui soict un peu destrempee & parfondue espesse
Et affin quelle preigne mieulx on chaufe legerement & de lomg
louvraige destain car estant froit la colle ne prendroit pas
Apres que ta fleur est ainsy reparee Tu resuits les
ioinctures des choses raportees avecq de la cire esb a esbaucher
qui est cire blanche meslee de force ceruse bien broyee ou pour mieulx
blanc de plomb la parfondant & acommodant sur ton ouvrage
avecq une petite poincte de fer chaulde En ceste sorte tu peux
reparer ces petites barbes qui sont au milieu de la rose ou
les trous de la qui pourront estre en quelque foeuille Apres
tu paindras ta rose selon le naturel Si tu gectes ta
rose en or ou argent tu peulx bien raporter & soulder Et
en ces mesmes metaulx quand tu as quelque chose delicate a
raporter comme une mouche ou semblable chose sur la fleur
la colle de poisson y est singuliere & tient bien fort larrestant
avecques quelques petites poinctes qui servent de clou
Les foeuilles & bouttons se peuvent mouler a deulx moules
qui se pourront ouvrir estant recuits mays non pas plustost
Apres lesdictes choses se raportent