154r - - - - - L’or n’estre fixe
L’or en doreure s’en va estant la piece recuite & tenue
à grand foeu, mesmement s’il y a du plomb, car le plomb
percera au foeu une piece d’or pource qu’il tient fort de
☿.
Couper plomb
À cause qu’il est gras & se grippe & attaque au costeau
ou ciseau, mouille le & tu le coupperas comme verre.
at left top margin
Quelque fois l’or
& l’argent prenent
par certaine fumée
quelque couleur au
gect. Mays cela n’est poinct escaille & chappe, ains ceste couleur s’en va au blanchiment &
bullitoire
Adoulcir l’argent
Quand les orfevres qui travaillent de grosserie ont
forgé leurs plats, bien souvent il advient avecq leur perte
qu’il se creve & fend pour estre trop enaigry. Pour
eviter cela, gecte dedans, quand il est bien fondu,
du mortier sec composé de sable & bonne chaulx qui a
esté en oeuvre, & le pulverise & gecte le dedans.
at left middle margin
Les orfevres ne travaillent
point d’argent de real
qui ne soict allié
pource qu’il est
plombeus & en
forgeant il s’aigrist.
Aulcuns souldent
pour petit ouvrage
& choses qui ne vont
qu’une fois au foeu
avecq quelque vieulx sol
& carolus recuit & battu.
Touteffois si le sol
n’est bien bon, la
souldure mange
& y fault soulder
deulx fois & s’y
trouve trop de cuivre.
Aultres souldent
avecq moictié argent
& moictié cuivre fin.
Escaille de fer
Estant bien pulverisé & subtiliée sur le mabre & meslée
avecq le sable susdict de noyau, et sechée lentement sans
recuire, endure plusieurs gects de plomb & d’estain. Le cuivre
& letton y viennent bien. Mays si elle n’est fort subtiliée comme
le crocum, elle va au fonds, si le sable n’est destrempé assés espés.
Limaille des metaulx
Elle ne se font pas d’elle mesme si elle n’est aydée de
quelque portion de metal semblable fondu pour
l’assembler & mectre en bain, car elle est plus tost
bruslée que fondue. La limaille d’estain et plomb
se font avecq du suif, celle d’or avecq du salpestre,
celle d’argent avecq du suin de verre.