152v - - - - - Reparer les choses gectées
Il advient souvent que ce que tu as gecté faict des
baves, ou par le default du moule, ou du gect,
ou du metal. Le default du moule vient du
plastre, qui n’est pas dur & fort et ne soubstient
pas au foeu (ce qui se corrige par le meslange
du crocum). Communement aussy, s’il y a imperfection,
c’est auprés du gect. S’il y a aussy trop d’estain
en chose mediocrement espesse, il ne vient pas bien,
pource que l’estain gecté espés se retire & soufle.
Les choses aussy moulées en creux sont fantasques
à gecter. Si doncq il arrive quelque default,
ayes un coisinet de cuir plein de sable subtil,
& l’ayant posé sur le bequet de la table des orfevres
où l’on lime, poses y ton ouvraige & le tiens seur
avecq une corde qui passe soubs ton pied. Le sable dans le sac obeist & se
renge tantost espés d’un costé & minse de l’aultre.
Lors tantost avecq un burin, fais & trasse rudement
les lignes subtiles qui sont obmises ou qui ne sont pas
assés aparentes, ou avecq une lime ou un chaple oste
les baves. Et s’il y a quelque default de matiere,
qui aye laisse quelque fosse ou chose trop cave,
regrate cela avecq un burin et encoche aultour du bort,
puys emprains cela avecq de la cire. Et pose
l’empraincte sur une lame subtile de plomb, & marque
ainsy la grandeur convenable de plomb ou de la ligue
semblable à ta matiere, puys pose la piece sur la
chose encochée & l’attache bien avecq du fil d’archal,
puys frotte de rosine le bort si c’est estain ou plomb
& pose tout aultour de petites pieces tanvres de souldure
ou d’estain ou d’aultre chose, puys avecq un fer chault
ou au foeu de la forge, soulde, et aprés repare
cela avecq les houtils susdicts & avecq les ciselets
convenables.
at left top margin
Pour l’or & petit
ouvraige, il le fault
cimenter sur une
boule de plomb,
qui se posera sur
le coissinet & se
tiendra ainsy
avecq la corde.
Figure at left middle margin
Figure at left bottom margin