151v - - - - - [continued]
Touteffoys ne l’oste pas que tu n’ayes du tout reparé la
tortue, car ceste terre te servira de ciment s’il te fault enfoncer
quelque chose ou reparer avecq le ciselet. S’il y a des
baves aulx joinctures du molle, tu les osteras ou avecq le burin
apellé chaple ou un trancheplume bien tranchant, ou avecq
une lime petite, & puys avecq le ciselet, ayant tousjours
pour mieulx faire le naturel devant toy. Tu peulx friser
sur une lime la pointe d’un ciselet qui ne soict poinct trampé,
pour faire quelque chose grumeleuse. Pour ces deulx
tortues & choses creuses qui presuposent estre assés
grandes, gecte ta ligue d’une moictié de plomb & d’une
moictié d’estain fin. Il y a plus d’affayre à mouler
une tortue qu’à douze moules de fleurs. S’il y a du crocum
dans ton sable, il n’y aura point de baves, & si par cas fortuit
il en y a quelques unes aulx costés, elles seront plus tanvres
que papier, pourveu que ton moule soict bien serré d’une presse.
Et pour faire les escailles des tortues ou aultres animaulx,
tu peulx faire des petits ciselets en forme de porte piece
ronde, aultres en façon d’une gouge ou d’une escaille de serpent
& lesard, et d’aultres sur une lime pour faire les friseures
& grommeleures. Les tortues qui ne se moulent poinct
creuses n’ont pas tant d’affaire, car elles se moulent en
deulx pieces, pour les reparer avecq les ciselets, de petits
portes pieces, de petites couges, & des ciselets cranés.
Figure at left middle margin
Huile de froment
Il fault le faire entre deulx lames de fer bien vives,
mesmement celle de bas sur laquelle, qui sera en pante, tu mectras
du froment bien esgal & uny. Et puys poseras dessus l’aultre
toute rouge, & la presseras jusques à ce que tu voyes bien
desgouter l’huile noire. Reitere cela tant que tu en ayes
assés. Cest huile est incontinent sec. Il dore les choses argentées
& brunies, augmente la couleur des choses dorées, sert de vernis
sur le fer pour aprés y graver, pour vernir en tané des gardes
d’espées. Et pourroit bien servir aulx faiseurs de cuir doré.
at left bottom margin
Il en fault user
comme il est recent
faict. Et pour les choses à
mouler, il ne veult pas estre si
espés que pour le tainct.
at left bottom margin
Il n’est pas
pour en oindre
les animaulx à
poil, car il est
trop fort &
roide, mays
bien pour en
donner un traict
à un pied de petit
animal, comme mouche & semblables. Il est aussy excellent pour le taint des pierres
blanches faulces .