Making and Knowing
A minimal edition of BnF Ms Fr 640

[TOC] | [translation]

- - - - - folio image: 151v - - - - -

[continued]

Touteffoys ne loste pas que tu nayes du tout repare la
tortue Car ceste terre te servira de ciment sil te fault enfoncer
quelque chose ou reparer avecq le ciselet Sil y a des
baves aulx joinctures du molle tu les osteras ou avecq le burin
apelle chaple ou un trancheplume bien tranchant ou avecq
une lime petite & puys avecq le ciselet Ayant tousjours
pour mieulx faire le naturel devant toy Tu peulx friser
sur une lime la pointe dun ciselet qui ne soict poinct trampe
pour faire quelque chose grumeleuse Pour ces deulx
tortues & choses creuses qui presuposent estre asses
grandes gecte ta ligue dune moictie de plomb & dune
moictie destain fin Il y a plus daffayre a mouler
une tortue qua douze moules de fleurs Sil y a du crocum
dans ton sable il ny aura point de baves & si par cas fortuit
il en y a quelques unes aulx costes elles seront plus tanvres
que papier pourveu que ton moule l soict bien serre dune presse
Et pour faire les escailles des tortues ou aultres animaulx
Tu peulx faire des petits ciselets en forme de porte piece
ronde aultres en facon dune gouge ou dune escaille de serpent
& lesard Et daultres sur une lime pour faire les friseures
& grommeleures Les tortues qui ne se moulent poinct
creuses nont pas tant daffaire Car elles se moulent en
deulx pieces Pour les reparer avecq les ciselets de petits
portes pieces de petites couges & des ciselets crane

Figure at left middle margin Figure @

Huile de froment

Il fault le faire entre deulx lames de fer bien vives
mesmement celle de bas sur laquelle qui sera en pante tu mectras
du froment bien esgal & uny Et puys poseras dessus laultre
toute rouge & la presseras jusques a ce que tu voyes bien
desgouter lhuile noire Reitere cela tant que tu en ayes
asses Cest huile est incontinent sec Il dore les choses argentees
& bruies augmente la couleur des choses dorees Sert de vernis
sur le fer pour apres y graver pour vernir en tane des gardes
despees Et pourroit bien servir aulx faiseurs de cuir dore

at left bottom margin

Il en fault user
comme il est recent
faict Et pour les choses a
mouler il ne veult pas estre si
espes que pour le tainct

at left bottom margin

Il nest pas
pour en oindre
les animaulx a
poil car il est
trop fort &
roide Mays
bien pour en
donner un trait
a un pied de petit
animal comme mouche & semblables Il est aussy excellent pour le taint des pierres
blanches faulces