151r - - - - - [continued]
la cire blanche de quoy tu as composé ta cire noire
soufrée ha si peu de substance, comme estant seiche et
purifiée, qu’elle ne laisse rien dedans, et coule fort
doulcement. Quand au charbon qui est meslé, s’il en demeure
il se brusle & reduict en cendre & se vuide aprés en
souflant par le gect. Tu pourrois bien ouvrir ton
moule aprés que la cire est fondue, s’il n’y ha
quelque chose fantasque qui se puisse rompre, comme quelque piece
raportée ou semblables. Aprés avoyr couvert les crampons
du luth de ton sable & avoyr couvert tout le moule, donne
luy par dessus une couche de luth commun, & puys saulpoudre
cela de brique pilée affin que tu le puisses mieulx manier.
Laisse seicher lentement le luth plustost que luy donner
foeu, qui fasse fondre la cire. La cire estant sortie par le
gect, ce qui en demeurera avecq le charbon se bruslera.
Estant recuit la premiere fois, luthe le pou de nouveau
pour le recuire la seconde foys, à cause que volontiers
le plastre, n’estant pas bon, aura faict retirer le molle et
se trouvera aulx joinctures entrouvert, qui pourra faire de
grosses baves. Et pour la seconde fois il ne le fault
pas recuire si tu ne veulx gecter qu’en plomb ou estain, ains
seulement faire que le luth soict bien sec & le moule
mediocrement chault. Pour ces tortues qui ont grand volume
& assés d’espesseur, il est mieulx de mouler ault gecter ton
plomb l’aliage de moictié plomb & moictié estaim, mesmement
en choses creuses. Car si tu n’as à gecter choses fort tanvres
& fort foibles, comme fleurs, fie toy plustost en l’abondance du
plomb que de l’estaim, qui soufle estant gecté un peu espés
& faict volontiers quelque default auprés du gect.
Maistre Alexandre dict ne s’estre jamays trompé avecq moictié
estaim & moictié plomb pour choses de poix & d’espesseur
du dos de costeau. S’il y ha du crocum les joinctures ne
paressent gueres, & par consequent les baves sont fort petites
& tanvres. Tu peulx reparer & par le trou du ventre tirer
la terre du noyau, le laissant long temps tremper.
at left top margin
Quand tu as
gecté ta cire
noire dans lae
moule, & quand
elle sera bien
froide, il te la
fault ouvrir par
moictié ton moule
pour faire le
gect. Et si la
figure de cire
noire se rompt
il n’y ha point
de danger, car elle
se peult tousjours
radapter avecq
la poincte de fer
touchant chaulde.
Ou bien si les
pieces ne sont
point separées
du moule, qu
elles se rencontrent
& se joignent comme
auparavant en
joignant & serrant
bien les deulx moictiés du
moule. Quand
la figure est
grande, il fault
croiser dedans
plus de fils de
fer pour soubstenir
le noyau. Figure
at left bottom margin
A
qu’en plomb ou
estain. Il fault
touteffois rougir
presque aultant le
moule, comme s’il y avoit
dedans quelque
animal à brusler,
affin que la cire se fonde bien & ne laisse rien dedans & s’escoule toute, tenant le moule panché vers
le gect en le recuisant. Et comme le moule sera recuit, laisse le refroidir doulcement puys soufle dedans
et attire vers toy en supant affin que la cendre de la cire sorte. Fais cela avecq un souflet.
[continued]