150r - - - - - Cire fort dure
Mesle avec icelle de la rousine et du bol, et ne la gecte pas
gueres chaulde.
Ligues diverses d’estain et plomb
Pour choses creuses comme tortues, moictié plomb fin et moitié
estaim.
Pour fleurs, presque tout estaim, sçavoir une lb d’estain fin
et deux ℥ de plomb fin.
Pour lesards qui sont espés d’un doigt ou deux, presque
tout plomb, sçavoir une lb de plomb fin et 4 ℥ es d’estaim
fin.
Moules
Ils sont moings subgects à se fendre en recuisant quand
ilz sont fort espés que quand ilz sont de peu d’espesseur,
pourveu qu’elle soict suffisante. Car estant tanvres, ilz n’ont
pas besoing d’estre gueres recui au foeu, & la longueur du
foeu les fait corrompre, mesmement quand le plastre
n’est pas fort.
Il est mieulx de recuire un moule seul que plusieurs
ensemble, pource qu’il y fault plus grand & violent foeu
que pour un. Et l’entredeulx des moules reserrant du
charbon allumé, se reverberent l’un l’autre, de telle sorte
que plus souvant tu trouveras tes moules crevés & fendus
de ce costé que d’un aultre.
Recuits donc tes moules seul, n’y faisant foeu
sinon pour le couvrir.
Et pource que ton plomb et estain s’aigrissent en les fondant
souvent rouges, pour l’adoulcir fonds le sans le rougir
et gecte en verge.
La brique refroidist le metal, & si ce n’estoit pour
donner liaison elle ne seroit point necessaire.
at left middle margin
Les moules recuits ne peuvent soubstenir
plusieurs gects. Mays ceulx dans lesquels
on ne veult gecter que plomb ou estain et
ou medailles plattes, n’estant que sechés,
en soubstiennent
beaucoup.
at left middle margin
L’escaille
de fer fort
subtillement
broyée
les rend
bien fermes
& forts.