149r - - - - - Ramollir le fer @ et le rendre fort
doux
Prens sublime chaulx vive savon de venise fiente de cheval
un peu moings de sublime que des aultres destrempe tout cela
ensemble comme paste & en empaste le fer & lenvelope en cella
avecq quelque meschant linge puys le fais recuire iusques
a ce quil soict bien rouge Ou bien laisse le soir dans un
bon foeu iusques au matin il sera fort doulx pour y bien
graver ce que tu vouldras
Or bas dallemaigne Electre
On lappelle or de rheim quon trouve aulx rivieres et est
or de paillelle Les orfevres dallemaigne Lont vouleu
affiner pensant le separer davecq ceste blancheur quilz
cuident estre argent Mays il demeure tousiours blanchastre
Qui demonstre que ceste blancheur est fixe & na faulte
que de taincture Cest Electre duquel il se peult faire
des coupes qui demonstreront le poison
Divers arts dallemaigne
Ils saydent fort des moulins deau & la pluspart des
artisans de metaulx dor & dargent & aultres font a ces
martinets faire battre leurs grands ouvrages Et pour
tirer le fil de fer ilz rougissent de grandes masses de
fer & luy ayant faict une poincte ilz le font acrocher
ainsy tout rouge & tirent ainsy promptement le fil
Medaille a reparer
Si tu veulx mouler quelque medaille pour te servir de patron
& pour ceste occasion la reparer iecte la la @ pluspart destain
& y mects abondamment de lestain de glace pour lendurcir