148v - - - - - Mouler tortues
Aprés rassemble les parties de ton moule et
cramponne curieusement toutes les joinctures, tant
de dessus & dessoubs que par les costés, n’ayant
pas oublyé d’encocher les joinctures des moules comme
aulx aultres. Ayant cramponé le tout, deffais
les crampons des costés & non les aultres. Et ainsy
ton moule de plusieurs pieces sem s’ouvrira comme
s’il estoit seulement de deulx moitiés. Si tu veulx
mouler creux, fais au milieu de la partie du moule
du ventre un trou de part en part qui, au dedans,
soict de telle capacité que le bout du petit doigt y
puisse presque entrer, eslargissant comme en clervoise le
dehors du trou. C’est pour jecter le noyau. Or
note que toutes ces difficultés ne seroient poinct si tu
ne voulois mouler creux, pource que tu pourrois
mouler la tortue de deulx pieces et la brusler
dedans, comme les aultres animaux, et seroit bien plus
tost fait. Mays comme la tortue est massive & qu’elle
se trouveroit pesante sans estre creuse, on l’estime
mieulx moulée de ceste sorte creuse, et en cha ceste façon,
pour faire bien un moule, il fault bien trois
jours. Advise en moules creulx & fantasques d’avoir
du plastre fort, qui endure le foeu sans se crever, s’il est
possible. Mays si tu n’en peulx avoir de tel, mesle un
peu plus d’alum de plume & adjouste y aussy du crocum,
qui le fortifie & faict que les baves, s’il en y a, viennent
si subtiles qu’elles sont aysées à deffaire. N’oublie pas
aussy de bien serrer avecq une presse tes moules, pour
obvier aulx baves qui se font ou quand le moule n’est
pas bien joinct ou quand il est crevé. Pour reparer,
si les traicts ne sont assés aparents, ressuicts les legerement
avecq un burin, puys les adoulcis avecq le ciselet. Les
baves s’ostent avecq le chaple, forme de burin. Pour les
grumeleures & escailles, elles se font ou avecq une petite
gouge ou petites portes pieces rondes, ou avecq la poincte d’un
ciselet non trampé & frappé sur une petite lime.
at left top margin
Fais ce trou
plustost que
mouler rejoindre
tes moules