148r - - - - - [continued]
pas venu si cler que je desirois. Je l’ay encore recuit,
laissé froidir, remis au blanchiment & grattebroissé. Il est
venu fort net. Ainsy feras tu du cuivre et argent. Et si tu veulx donner
Belle couleur au letton
L’ayant bien nettoyé, comme dict est, & bien grattebroissé,
fais le bouillir en eau & racine de cucurme ou terra merita,
et il viendra tres beau.
Blanchiment
Si c’est pour argent, ne pile pas ton tartre avecq du
fer, ains avecq le manche du marteau, car si tu touches
& trempes du fer en ton blanchiment, l’argent viendroit
rouge comme cuivre & te le fauldroit recuire & remectre
au blanchiment. Ne mesle rien avecq ton tartre qui ne
doibve entrer au blanchiment, car cela le corromp. Ne le
laisse pas verser hors son premier bouillon, car en cela
est toute sa force. Le blanchiment se faict d’une partye
de tartre pulverisé & la moictié de sel commun.
Mouler pied de butor ou
d’aigle ou d’aultres oyseaulx pour
pied de salieres ou vases
On moule communement le pied & la jambe jusques au jarret.
Et pour cet effect, on le moule à cinq pieces: la jambe de
deulx pieces, le dessus du pied en deulx et le dessoubs d’une
piece.
at left bottom margin
de trois pieces
Crocum ferri
Pour le faire bien tost, rougis la limaille dans une caisse de fer,
le remuant souvant. Puys arrouse le de bon vinaigre & le laisse evaporer
& sans l’oster de dessus le foeu,rou laisse le rougir & enflammer. Estant froid,
pulverise le sur le mabre & le retourne au foeu, arrouse de vinaigre,
et puys enflamme. Ainsy il sera bien tost coloré & subtilié.