146v - - - - - Mouler tortues
Cecy est en suicte du deuxieme foeillet præcedent.
Comme tu as bien descouvert la partie du ventre de la
tortue, les dessoubs de la gorge & des pattes, & bien nettoyé
le tout, n’oublie pas de descouvrir nettement ceste concavité
que ces animaulx ont dans leur coquille, entre le col & les
Espaules. Celles d’eau ne l’ont pas si enfoncé que celles de
garrigue, qui sont les plus maigres. Et entre icelles
il en y a qui l’ont plus enfoncé que les aultres. N’oublie
doncq de bien descouvrir tout cela pour mieulx representer
le naturel. Mays s’il y a quelque concavité qui s’entourne
trop en dedans et ne soict point en voeue ne en despouille,
mects y de petits lopins de cire, & avecq des poinctes
de gros fil de fer chault, estants & adapté ladicte
cire. Puys bouch bouche avecq de l’ardille molle l’entrée
de toutes ses cavités. Mects le cercle d’ardille aultour
de ton moule, faict desja de deulx pieces, qui contient le
dos de la tortue. Et pour mouler le ventre d’icelle,
il te le fault departir en trois comme tu vois. Sçavoir
tu mectras un entredeulx d’ardille dessus la gorge & un
aultre sur le bort de la coquillle de la queue, # Et ayant
huilé et la coquille du ventre & l’ayant frotée d’eau de
vye, jecte ton sable un peu espés & destrempé avecq eau
chaulde comme devant. Ayant faict prise, oste ces entredeulx
d’ardille, puys descouvre bien les pattes de devant & derriere,
sçavoir la partie de dessoubs & la queue & la gorge,
& oste l’ardille des cavités qu toute à une piece si tu peulx,
car cela te monstrera si ceste cavité sera bien en despouille.
Et si l’ardille retirée emmene la cire que tu y avois mis,
remects la aulx lieulx qui ne peuvent despouiller, comme dict
est. Et si quelque partye c’est retirée ou desmise, attache
& rejoincts la au moule avecq de la cire & la poincte de fer
chault. N’oublie de mectre de po la cire fondue au bout
des ongles de la tortue pour faire le gect. Ta coquille
du ventre moulée et descouverte, ton moule se verra en ceste sorte.
Figure at left middle margin
at left middle margin
de sorte que la
seule coquille du
ventre entiere
soict descouverte, pour
la mouler seule.
Figure at left bottom margin
[continued]