143v - - - - - [continued]
d’une patte jusques à l’aultre, affin que les extremités
escartées se viennent à raporter l’une à l’aultre par le
moyen desdicts gects, lesquels tu commanceras aulx ronds
vuides de cire que tu as mis au bout des pattes pour
y attirer le metal. Ainsy, le gect se faisant par la
cire, tu n’es poinct en danger d’escrouster rien de l’animal
moulé. Et est plus expedient de faire ainsy les gects
de cire pour gecter dessus le second moule qu’attendre
à les faire, aprés que le moule est recuit q, car lors
il fault, s’il est possible, que tout soict prest. Il fault
bien chaufer & mesmes rougir les moules où il y a des
gects de cire, affin qu’elle se fonde bien & ne laisse rien
dedans.
Carquans faicts à jour
Ilz se moulent comme les escrevisses en noyau, premierement
d’un costé estant rehaulssés d’ardille ce qui est cave, & puys
on les descouvre de l’aultre & on faict le second gect.
Ils se peuvent bien aussy gecter en chassis pourveu qu’ilz
soient bien en despouille. S’ilz ne le sont, on les esbauche
en cire ou bien on remplist les cavités qui ne peulvent
despouiller de cire ou ardille.
Limaille de fer
Pource que communement la limaille est meslée d’ordures, il est
bon de la rougir au foeu pour brusler les immundices
et puys la laver en eau claire. En ceste sorte, les
salettés iront au dessus de l’eau que tu gecteras & la
bonne limaille ira au fons.
Oeillets
Pource que ceulx qui sont gectés sont communement massifs,
ou bi ilz sont pesants & pour ceste occasion on les faict de
foeilles & lames d’argent.