Making and Knowing
A minimal edition of BnF Ms Fr 640

[TOC] | [translation]

- - - - - folio image: 143v - - - - -

[continued]

dune patte jusques a laultre affin que les extremites
escartees se viennent a raporter lune a laultre par le
moyen desdicts gects lesquels tu commanceras aulx ronds
vuides de cire que tu as mis au bout des pattes pour
y attirer le metal Ainsy le gect se faisant par la
cire tu nes poinct en danger descrouster rien de lanimal
moule Et est plus expedient de faire ainsy les gects
de cire pour gecter dessus le second moule quattendre
a les faire apres que le moule est recuit q car lors
il fault sil est possible que tout soict prest Il fault
bien chaufer & mesmes rougir les moules ou il y a des
gects de cire affin quelle se fonde bien & ne laisse rien
dedans

Carquans faicts a jour

Ilz se moulent comme les escrevisses en noyau premierement
dun coste estant rehaulsses dardille ce qui est cave & puys
on les descouvre de laultre & on faict le second gect
Ils se peuvent bien aussy gecter en chassis pourveu quilz
soient bien en despouille Silz ne le sont on les esbauche
en cire ou bien on remplist les cavites qui ne peulvent
despouiller de cire ou ardille

Limaille de fer

Pourceque communement la limaille est meslee dordures Il est
bon de la rougir au foeu pour brusler les immundices
Et puys la laver en eau claire En ceste sorte les
salettes iront au dessus de leau que tu gecteras & la
bonne limaille ira au fons

Oeillets

Pourceque ceulx qui sont gectes sont communement massifs
ou bi ilz sont pesants & pour ceste occasion on les faict de
foeilles & lames dargent