143r - - - - - Mouler tortues
La tortue deau est plus belle a mouler pourcequelle ha
plus belles escailles & les jambes droictes Et celle de
garrigue les ha tortues Elles sont de grande vye
partant pour les faire mourir Ouvre leur la gueule
& leur passe un long trencheplume par touts les intestins
& puys luy fais avaller du vinaigre mesle deau de vye
ou urine comme pour les serpents Il les fault mouler
a plusieurs pieces & le dos mesmes quelques fois pourceque
les costes sont a quelques unes plus estroits quailleurs
& ne sont pas a ceste occasion en despouille Pour les
faire mourir il ne les fault pas faire bouillir car elles
se deffont & mesmes la coquille par leau chaulde Elles viennent
mieulx creuses pourceque leur grande espesseur corromproit
le moulle Celles deau sont plus vigoureuses Celles de garrigue sont
plus maigres plus lentes & plus endormies Si tu grattes celles deau
sur leur coquille quelque endormies quelles soient elles sesbougent celles
de garrigue non
at left top margin
Elles meurent asses tost dans
le vinaigre mesle dun peu deau
de vie ou durine comme tous aultres
animaulx
at left top margin
Elles se tiennent
lhiver les yeulx
clos & sont comme
mortes estant
assopies du froid
Elles se cachent
en terre ou soubs
de la balle de
bled ou fumier
chauld & ne
vivent que de
lhumeur de la
terre
at left middle margin
@ Il ne les fault
pas mouler si tost
quelles sont
mortes pource quelles
sont encores
trop roydes
Mays le lendemain
tu les manieras
& plieras les
pattes comme tu
vouldras
Mouleurs de foix
Ceulx qui moulent de travers font leur sable de crocum
& dardoise calcinee Mays lardoise retient toujours de son
asperite & soufle pourcequelle est grasse En noyau elle nest
pas bonne En sable elle se peult accommoder Ilz tamisent
leurs sables Les broyent sur le porphire Et les destrempent
en eau & en retirent le plus subtil qui est au dessus puys
le recuisent
Crapault
Estant moule il se peult oster sans le brusler pource
quil est bien de despouille Choisis les plus gros & plus
grumeleus Pourcequilz contiennent beaucoup de metal
il est mieulx de les mouler creux Car ilz en viennent mieulx
Tu pourrois bien faire le gect tout dune piece & large
mays il s seroit malaise a coupper Il est mieulx de le faire
a trois ou 4 parties qui soient un peu larges pres de lanimal
& comprenent le plus du bord diceluy qui est vers le gect que faire
se pourra Fais aussy des conduicts de gect depuys le bout
at left bottom margin
Figure
Laisse
refroidir le
moule plustost
que louvrir
mesmement aulx
choses espesses
[continued]