141r - - - - - Mouler une escrevisse
S’il y manque quelque petite chose, tu la
peulx rejoindre ou bien remplir avecq du ciment
d’orfevre
.
L’escrevisse est des plus fantasques à mouler, mays aussy
donne exemple de mouler beaucoup d’aultres fort difficilles.
Les masles se discernent par les oeufs que portent les femelles,
et par quattres jambes petites jambettes blanches au bout qu’ont
les masles ap au dedans de la queue, aprés les huict jambes
principalles. Il n’est que bon de les faire un peu seicher pource que
les grumeleures n’en viennent que plus dures rudes & plus
belles, car tout ce qui est de coquille ne se diminue pas. Il est
vray que si tu les laisses trop seicher, ces petites jambettes
de dedans se diminuent & rendent plus gresles & n’ont pas
tant de corps. Si aussy elles sont trop seiches, la chair
se separe des escailles. Advise doncq de te servir de
la mediocrité. Elles ont certain poil entre les pattes & au
bout de la queue. Et pource que tout poil est fascheux à
mouler à cause qu’il s’embrouille avecq le sable & ne se
despouille pas, tu le peulx brusler avecq un fer chault
aulx escrevisses pource que on ne s’en apercoit. Quand aulx
animaulx qui ont poil ou plume, il fault que tu les oignes
d’huile d’olif de froment, qui est incontinent sec & qui fera coucher
& estendre le poil. Ainsy tu auras la forme de ton animal,
et le poil aussy se monstrera, mays faict à ondes, et
c’est chose qui se peult reparer. Si ton escrevisse a des
oeufs qui sont delicats, et qui seroient malaisés à descouvrir
sans rompre, tu feras mieulx de faire le premier gect
sur le ventre & les oeufs, affin qu’il te ne te faille descouvrir
que sur le dos, qui est dur & facile à manier. Et le ventre
& les œufs demeurront dans le moule, et fauldra les
faire brusler dedans plustost qu’ouvrir ton moule & en
pour la seconde foys. Ainsy tout il s’ouvrira aisement, car
ce qui est bruslé ne fera plus de prise. Aussy le second
gect qui se faict sur le premier, qui ha bien faict
prise, se separe aisement du premier aprés estre recuit,
qui est un particulier secret pour semblables moules.
at left top margin
Le gect se faict par la
queue fort tanvre.
at left top margin
N’oublie pas
de frotter d’eau
de vye plustost
que mouler.
at left top margin
Le cerf volant,
l’escrevisse & le
chancre se moulent
de mesme façon.
at left middle margin
Si ton escrevisse
a d n’a point
d’oeufs, moule
le dos en hault
& le ventre en
bas. Tu luy
peulx donner.
at left middle margin
Elle se pourroit
bien mouler creuse
quand aulx corps,
mays les pates
ne le pourroient
pas faire.
Et pour bien
faire, l’escrevisse
est assés fantasque
à mouler sans
chercher le
creux, cela se
doibt reserver
pour les tortues.
at left bottom margin
Quand tu ouvres
ton moule, tu
trouveras l’escrevisse
en os blanc, mays
non en pouldre.
Et sans l’ouvrir,
le ☿ n’y feroit rien.
at bottom margin
Couche ces
couleurs à huile
fort cleres.
at right bottom margin
Pour la paindre, fais la bouillir avecq du vin & un
peu de sel affin qu’elles viennent bien rouges & prens y patron.
Pains le dos de vermeillon meslé de laque & les costés & dessoubs
du ventre & des jambes avecq du vermeillon & de l’ocre jaulne
et du blanc.
[continued]