139v - - - - - [continued]
ou de terre, ou de lames de cuivre ou de fer, ou de bois
revestu de fer blanc, pour y ensevelir plus commodement lesdicts
moules entre les planches de cuivre & l’estrié ou vis de fer.
Gect en cire pour representer
l’animal qu’on n’a point
Prens cire blanche, qui est plus propre pour cest oeuvre que
nul aultre à cause qu’elle est plus ferme & ne laisse pas
tant de crasse, aultant que tu en auras besoing pour
mouler l’animal que tu proposes & non plus, et la
moictié aultant de charbon pilé & subtillement passé par
un linge ou manche. Le charbon donne couleur et corps à la cire,
qui aultrement seroit transparente, & ne se verroit
pas si bien le traict. Mects doncq ta cire à fondre
à foeu de charbons. Et comme elle sera bien fondue & bien liquide,
ayes, pour une pleine escuelle à oreille de cire fondue,
du soufre la aultant qu’une grosse noix. Pulverise le,
fais le fondre sur foeu lent, & comme il sera fondu ne le
laisse pas sur le foeu, car il viendroit trop dur, mays retire
le & le mouve tousjours avecq un petit baston, & laisse passer
son ebullition, & comme il sera liquide comme eau gecte le dans
la cire, que tu auras ostee de dessus le foeu. Et mesle &
remue tousjours l’un & l’aultre, affin qu’ilz se meslent bien.
Aprés mesles y en remuant tousjours & à plusieurs foys
le charbon susdict pulverisé à plusieurs foys. Et comme il
sera bien incorporé, advise si ta cire a passé sa grande
chaleur, ce que tu cognoistras quand elle ne fume plus, quand
elle faict de grands traicts se retirants aulx borts, & non meus,
& pres de l’un de l’aultre. Car si tu gectois trop chault, tu ne
pourrois separer ta cire du moule, & prendroit au gect.
Comme elle est en ce bon estat, remue la d’un petit baston, affin
que le charbon pulverisé soict partout & non posé au
fonds. Et en ceste sorte gecte dans ton moule petit à petit,
& non à coup, pource que la cire par son onctuosité ne coule
at left top margin
Ceste cire noire
soufrée est pour
esbaucher des
figures rondes,
qui ne sont poinct
en despouille,
et qu’il fault
brusler dans le
moule à noyau,
plustost que l’ouvrir
po comme celles qui
ont quelque
advancement ou
enlassement de bras
& jambes. Et lors
ceste cire, par le
moyen du soufre,
se font avecq
fort peu de chaleur
et sort sans
laisser aulcune
crasse. Si par
cas fortuit le
charbon pilé y
demeure en cendre,
en ouvrant le
moule & souflant
dedans il demeure
net.
at left bottom margin
@Pour fayre
serpents de cire
ou aultre chose,
pour apliquer
sur un cierge, il
les fault gecter de cire à esbaucher de toutes couleurs.
[continued]