138v - - - - - Talc meslé aulx moules
J’ay prins de celuy duquel j’avoys tiré l’huile. Je l’ay broyé
encores fort subtillement s dans un mortier d’acier avecq
un pilon fort grumeleux comme une lime. Je l’ay rendu fort
subtil & en pouldre cottonée & duvetteuse. Je l’ay meslé
avecq le sable & l’ay destrempé ensemble & l’ay gecté en
noyau. Il ha moulé en no tres net, & ne fault point
doubter qu’il ne tienne au foeu.
Or gecté fort tanvre
Quand promptement les orfevres ont affaire de souldure
et n’ont pas loisir d’en forger, ilz en fondent d’or, et
puys le gectent sur un linge ou aultre chose qui soubstiene
le foeu, et soubdain l’aplatissent avecq un marteau ou chose
semblable. Et il se trouve fort tanvre & reçoit mesmes
l’impression du linge.
L’or fin non alié se peult bien gecter en medaille,
mays non pas en herbes & lesards & choses fort
subtilles s’il n’est allié.
Une pensée oincte d’huile de froment se peult bien gecter en
or allié.
Et aultres foeilles deliées, mays que la branche ne soit
pas grande, et les foeilles particulierement gectées se peuvent
soubder.
Diamants contrefaicts mis en oeuvre
Donne une legere couche au dedans du chatton de cire noire
pour esbaucher, puys oings ce dedans ainsy ciréd’huile de
froment, & puys pouldre cela de fumée de lampe, car il ne
fault pas que ceste ce tainct aye lustre pour pierres faulces.
Cela faict, poses y ta pierre & puys avecq un bout de cire,
puys avecq une poincte d’acier & un martelet à tatiner joincts
les bords du chatton à la pierre affin que le jour n’y entre point.
Mays garde de frapper la pierre, qui se romproit.