138v - - - - - Talc mesle aulx moules
Jay prins de celuy duquel javoys tire lhuile Je lay broye
encores fort subtillement s dans un mortier dacier avecq
un pilon fort grumeleux comme une lime Je lay rendu fort
subtil & en pouldre cottonee & dumetteuse Je lay mesle
avecq le sable & lay destrempe ensemble & lay gecte en
noyau Il ha moule en no tresnet & ne fault point
doubter quil ne tienne au foeu
Or gecte fort tanvre
Quand promptement les orfevres ont affaire de souldure
et nont pas loisir den forger ilz en fondent dor Et
puys le gectent sur un linge ou aultre chose qui soubstiene
le foeu Et soubdain laplatissent avecq un marteau ou chose
semblable Et il se trouve fort tanvre & recoit mesmes
limpression du linge
L’or fin non alie se peult bien gecter en medaille
mays non pas en herbes & lesards & choses fort
subtilles sil nest allie
Une pensee oincte dhuile de froment se peult bien gecter en
or allie
Et aultres foeilles deliees mays que la branche ne soit
pas grande et les foeilles particulierement gectees se peuvent
soubder.
Diamants contrefaicts mis en
oeuvre
Donne une legere couche au dedans du chatton de cire noire
pour esbaucher Puys oings ce dedans ainsy cire dhuile de
froment & puys pouldre cela de fumee de lampe Car il ne
fault pas que ceste ce tainct aye lustre pour pierres faulces
Cela faict poses y ta pierre & puys avecq un bout de cire
puys avecq une poincte dacier & un martelet a tatiner joincts
les bords du chatton a la pierre affin que le jour ny entre point
Mays garde de frapper la pierre qui se romproit