137v - - - - - Destremper sable pour moule de
medailles plattes
Les medailles plattes de cire ou de metal s’huilent fort
legerement, & puys se touchent avecq un pinceau d’eau de vye.
Et affin que le moule destrempé d’eau prene sans refuser
sur la chose huilée. On faict bien chaufer l’eau pour
destremper le sable, car avecq l’eau froide il refuseroit.
Les medailles s’huilent pource que elles ne prestent
point, & par ainsy pourroient rompre le molle. Les
animaulx qui prestent ne veulent point estre huilés
L’eau chaulde doibt estre de telle chaleur que tu n’y
puysses tenir le doigt, sinon avec sentiment bien chault.
Destrempe le sable plus espés pour medailles plattes &
solides que pour lesards & choses subtiles. Ton sable
ayant faict prise, nettoye & rascle ton moule d’un costé
& d’aultre & fais une coche au pied & au ras de la medaille
du costé du gect, affin que tu la puisse mieulx enlever.
Abaisse aussy le molle rasclant l’entour de la medaille, affin que de touts
costés, tu la puisse bien enlever sans qu’elle corrompe le
moule. Aprés fais tes entailleures aultour d’un du
premier molle gecté mes, affin que le second gect s’y
conjoigne sans varier, & mesmement fais une coche au
fonds du molle où est la teste de la chose moulée.
Fays en aussy aulx costés du gect. Cela faict,
trempe le revers du premier molle dans l’eau, huile le,
& ainsy il ne s’emboira point. Frotte le revers de la medaille
d’eau de vye & secondement gecte destrempant en eau chaulde.
Si tu as moulé une medaille en noyau, ayant faict le
premier gect & iceluy ayant faict prise, cerne avecq la
poincte d’un costeau l’entour de la medaille, affin qu’elle se
trouve enlevée sur le gect & non ensepvelie dans iceluy.
Puys, ayant faict le second gect & ayant ouvert ton
moule, ayes enleve la medaille tout d’un coup avecq un
deulx poinctes de costeau q, et que l’une la preigne du costé
du gect & l’autre du costé de la teste, qui est à l’oposite.
at left middle margin
Garde bien de
n’huiler gueres
la medaille car
si l’huile redonde,
il divertist le sable
de s’unir & amasser,
& le faict ondoyant
& grumeleux. Il
ne fault que
toucher le milieu
de la medaille
d’un p de la poincte
du pinceau huilé,
& puys estandre
l’huile partout.
at left bottom margin
Surtout fais
que le gect soict
le plus large
que tu pourras
pvers la medaille,
& l’embrasse bien.
Que l’entrée du
gect soict ample,
allant tousjours
en apettissant
vers la medaille.
N’oublie pas
aussy d’encocher
l’entrée du gect.
[continued]