137r - - - - - Pour gecter en cuivre rouge
Le cuivre rouge pur de chaudron ou dautres ouvrages
tanvres est propre pour gect Et pour le faire courre gectes
y du sel armoniac & comme tu seras prest a gecter mects dedans
un peu destaim fin & fort peu Et note quil fault gecter
le cuivre fort chault dans le moule qui soit aussy enflamme
& tout rouge comme en lor argent letton & metal Tu cognoistras
quil sera asses chault quand il est uny clair & luisant comme
un mirouer de cu dacier nouvellement poly ou comme largent fondu
Garde le vent car aussy tost il se refroidist Arreste avecq
des estoupes ou le gect pour garder quil ne se refroidisse
Le cuivre rouge vient plus net que le laitton qui ha
force fumees qui empeschent de courre Je lay moule en
noyau net comme le principal & tanvre comme papier Il faut
quil soict si chault quil soict blanc & luisant & poly comme
argent fondu et comme un mirouer Je lay gecte au mesme sable que dessus en
noyau
at left top margin
Le cuivre et letton sont le plus longs a fondre que nul des aultres metaulx
mesmement le cuivre rouge
Mays aussy il coule & vient
bien net pourveu quil soit gecte
fort chault
quil soit comme eau
at left top margin
Ostant ton moule
du foeu plante
le dans desu brasier
duquel soict
remply un pot
ou vaisseau@
Huile tingente pour fayre
courre les metaux
Prens ☿ sublime de venise vray & non arsenic sublime un poix
Aes ustum un poix Sel armoniac un poix pulverise
tout apart & apres mesle le tout dans une bouteille de
verre & mects sur cendres chauldes Tu verras que tout
se dissoubdra comme cire faisant force couleurs Laisse
tout congeler & mets en un peu sur chasque metal fondu & il
courra merveilleusement
at left middle margin
Les fondeurs
de grand gect
pour statues
y gectent force
tartre pour le
nettoyer de sa
crasse & ordure
& force sel
armoniac pour le rendre clair & net
Et quand ilz veulent gecter ilz y
mectent force estain Le froid &
humidite luy est fort contraire
Ce qui rend
dangereulx lestat
du fondeur
car il ne fault
qun sourdis
deau dans la
fosse pour
perdre tout
Crampons
Ils se font avecq les tenailles plattes de fil de fer recuit
& replye puys battu par les bouts sur lenclume Comme ilz sont
ainsy subtilies ils sont subgects a se brusler les mettant souvent
dans les moules a recuire Sers toy doncq des nouveaulx
Figure at left bottom margin
