129r - - - - - Paindre herbes de metal
Si tu as haste, il sera mieulx que tu destrempes tes couleurs
à gomme point trop espesse ou car l’huile est long à seicher
et coule s’il est couché cler, comme les herbes requierent, et si tu
veulx encores avoir promptement faict, destrempe ta couleur avecq de
la glaire battue avecq de la pelure de figuier, et bien tost
ton ouvraige sera sec. Mays couche cler.
Pour santonique
Ce blanc blafart de ceste herbe se faict de vert de terre,
de blanc de plomb ou ceruse, d’un peu de massicot et scudegrun
et de cendré d’azur. Mesle & compose ta couleur selon une
branche naturelle que tu auras.
Couleur de vipere
C’est le plus beau serpent qui se puisse mouler, à cause qu’il ha
fort belles escailles & rudes & transparentes. Sa couleur naïfve
se faict avecq de bon verdegris fort broyé avecq de bon
vinaigre, s’il est de plomb ou d’estain. Et s’il est en quelque
endroit plus obscur, parfume ceste premiere couleur de soufre,
comme tu sçais. Et s’il fault esclarcir et blanchir comme soubs
la gorge, frotte d’un linge rude. Le masle gecte par sa nature,
qui est au fondement, quand il est fort pressé, une petite masse comme une
demy balle d’harquebus faicte en genitoires et toute
plaine de aiguillons fort veneneulx
at left middle margin
+ Mects un peu de
metalline dans
ton estain & ton
lesard semblera
d’argent.
Roses moulées
Elles sont malaisées à mouler à cause que les foeuilles sont fort
subtiles & foibles & doubles. Mays pour obl obvier à cela,
il les fault oindre d’huile de froment, qui est fort desicatif.
Et estant bien tost sec, il affermist & roidist les foeuilles pour les
pouvoir distinguer & soustenir le sable destrempé. Le mesme se
faict aulx mouches, aulx pensées & semblables choses delicates,
aulx fleurs de caprier.