128v - - - - - [continued]
Tu verras qu’elle le tormentera & l’eschaufera bien fort
et bien tost le rendra fort liquide & disposé à gecter et l’esclarcira
comme il apartient. Quand il est en cest estat & qu’il est fort blanc
et poly, reluisant comme vif argent, prӕpare toy de gecter.
Et pour cet effect ayes du sable maigre delié, dans
une terrine ou aultre vaisseau duquel tu te vouldras ayder.
Fays une fosse dans le sable, puys avecq tes molettes
prens ton moule bien rouge & le pose dans ceste fosse de
sable. Couvre incontinent l’ouverture de ton moule affin que
aulcune cendre & poulsiere n’entre dedans, & lors acheve de
l’entourner de sable jusques au bout du gect & des souspirailz.
Ce faict, descouvre ton moule & gecte dessus ton argent bien
fondu la grosseur d’un pois ou environ de ce grain metallique
qui incontinent s’espandra par tout ton argent & le fera bouillir
& tourner. Gecte aussy tost que tu y auras mis ceste
matiere, car c’est ceste cy qui est le secret de faire courre
l’argent, comme sa crouste l’eschaufe & l’esclarcist. Tu
peulx gecter argent plus fin que la ligue du capital et
comme de realle, mays que tu y adjoustes de ce grain.
at left top margin
Ne laisse pas pour cela de mettre devant toute chose un peu de borras dans l’argent
fondu, car encores
que les orfevres n’y
en mectent point,
touteffois il y est bon
et je l’ay veu bien pratiqué.
Aprés on y mect de la
croste de la matiere
de par deulx diverses
foys & puys de la chose
metallique. Lors garde la
qui soict posé au bout
de ta forge.
at left top margin
Si tu veulx soufler la
cendre qui est aultour
de ton moule lors que
tu le tiens entre les
molletes, tiens luy l’ouverture
en bas & soufle.
at left middle margin
Quand l’argent est bien
fondu tu le peulx bien
descouvrir et soufler
avec le petit souflet,
non pas continuellement
comme à l’or, mays
pour gecter hors les
charbons seulement pour
y mectre les matieres
qui le font courre.
Blanchiment de l’argent gecté
Pour ce que on gecte communement de bas argent, & mesmement
les Allemands, et que telle ligue face volontiers quelque
chappe ou croste, qui est contraire au Nos Aulcuns orfevres de
France sont communement bien empressés à blanchir leurs
ouvraiges, mesmement les grossieres, pour ce qu’ils n’usent
que du commun bullitoyre, qui est de tartre & sel commun,
presque autant d’un que d’aultre. Mays j’ay veu un
excellent Allemand travailler ainsy. Ayant en ma presence
gecté un petit lesard de ligue de teston, il fist une croste
grisatre. Et pour l’en nettoyer, il le fist bouillir au bullitoyre
susdict de tartre & sel commun pulverisé et meslé d’eau commune, au foeu
de sa forge. En estant sorty, il le grattebroissa. Et pour ce que
il n’estoit pas net à sa fantasie de ceste croste, il fist brusler
du tartre dans du papier jusques à ce qu’il fut noir & ne fuma plus. Puys
il destrempa ledict tartre d avecq de l’eau du bullitoyre, composée
de sel & tarte, & en couvrit tout son lesard. Puys le mit entre les
charbons de vifs de la forge & soufla un peu. Quand le lesard fut
rouge, il l’osta, le laissa froidir puys le recuit au bullitoyre.
Aprés le grattebroissa dans l’eau claire.
at left bottom margin
+ Note que le bullitoyre
pour l’argent n’est jamays
bon dans un crusol,
pour ce que l’eau prenant
la forme du f tartre
s’esvapore. Mays le
vaisseau pour bouillir,
estant de cuivre, est
excellant pour le blanchiment
de l’argent & pour la
saulce qui colore l’or.
at left bottom margin
Il observoit de ne
laisser pas tant
bouillir son eau de
tartre qu’elle reversast
par dessus, pource que
lors sa force s’en
va. Doncq quand ceste
premiere furie de bouillir
viendra, oste la du foeu
& luy remects. Il tenoit
pour secret ce tartre
bruslé mis dessus pour
l’argent bas.