127v - - - - - Terre des fondeurs
Cest de la terre bolvene meslee de fiens ou bourre qui
tienne au foeu de laquelle il te fault tousjours avoyr
provision pour luter tes moules qui ont b doibvent servir
a gecter argent & quil fault recuire Ceulx ou il fault
brusler quelque fleur ou animal ne se doibvent pas luter
quilz ne soient este une fois recuits Et quilz ne soient nettoyes
des os & cendres demeures dedans Et que ayant ostes les
crampons tu nayes ouvers les deulx moicties pour voir silz
sont point fendus Car il y a du plastre qui nest pas si dur
au foeu lung que laultre Daultre y en ha qui faict
crouste des choses qui demeurent a brusler dedans Et cela
sont imperfections quil fault eviter Ou par en baignant
fort deau de vye lanimal plustost que dy gecter le sable
destrempe Ou y mesler ou plus ou moings de brique ou
alum ou recuire plus la brique ou au lieu de brique y
mesler des culs de crusols & semblables choses qui resistent
fort au foeu Ayant doncq recuit ton moule pour bruser
le dedans laisse bien froidir Et sil est net & point fendu
remects les crampons & lutte le avecq ceste terre susdicte
des fondeurs & saulpouldre un peu de cendre criblee &
laisse un peu essorer Mays garde toy bien de luter
quilz ne soient que les moules ne soient froicts Ceulx pour
gecter argent ou ny ha rien a brusler dedans nont besoing
sinon quand le gect & souspirails sont faicts que de les
luter & les recuire une foys Ne lute point le bout du
moule par ou tu veulx faire le gect Ains laisse le descouvert
& lissue des souspirails aussy
Si Les moules qui se do doibvent fendre sest rendent ainsy a la premiere
recuite Car a la seconde il ne se fendent plus
Les plus petits moles sont plustost recuits prens les doncq
les premiers recuits quand tu gectes Car tu en peulx mectre
a recuire plusieurs
Allume les charbons premierement a la forge ou en quelque
aultre lieu pres & ayant pose tes moules sur une couche de
bonne braise pas trop allumee pour donner feu lent au comancement
mects y & adjouste peu des charbons demy allumes a la forge
at left top margin
La terre de laquelle les fondeurs
se servent pour braser ou soulder qui est
terre ardille areneuse
Ou bien ardille meslee
de sable apres lavoir
seichee & tamisee &
puys composee est bonne
pour luter tes moules
car ceste terre se fond
plustost que ce fendre
Et toute terre qui se
fond est ne peult manquer
en cecy
at left top margin
Fil de fer pour donner liaison
Figure at left top margin
at left middle margin
Lute espes tes
moules & silz sont
petits tu les peulx
incontinent recuire
a bon foeu mesmement ceulx de
crocum
at left middle margin
Si la terre est
bonne & l ne se fend
point en recuisant
& ne se separe point
du moule Les
moules ne se fendront
point aussy & ne
feront point de
baves au gect
Recuits doulcement
a laise a foeu
clos & ne les exposes
pas chaulx @ a lair
at left middle margin
Lute asses espes
a deulx ou trois
couches mesmement au
droict des joinctures
affin que largent ne
sorte du moule
at left bottom margin
Recuits en four
de reverberation
at left bottom margin
Pour essayer si ta
terre est bonne plustost
que la mectre sur tes
molles Lutes en cet
endroict de la fo muraille
de la forge qui est
aultour de la tuelle
& canon du souflet
& allume le foeu & si elle soubstient sans se fendre
elle sera bonne