124r - - - - - Animaulx à poil et fleurs foibles
et fort tanvres
Les animaulx à poil sont malaisés à mouler pource que le
poil se releve & se represente comme meslé & à to parcelles amassées.
Partant il le fault tenir couché avecq quelque chose desiccative
& qui l’affermisse. Et en cela la plus singuliere chose est
l’huile de froment, de laquelle tu l’oindras. Estant gecté, tu le
pourras reparer. Le corps des papillons et les herbes
qui ont la tige & les foeilles bourrues de certain poil
follet & lanugineulx se doibvent aussy oindre de mesme huile
pour tenir ceste bourre couchée; ensemble les fleurs qui ont la
foeille fort delicate & tanvre, car l’huile de froment sec les roidist et affermit.
Et si quelqu’un se vante de mouler ce qui luy sera presenté,
donne luy à mouler la teste bourrue de l’herbe appellée dent
de Lyon ou un papus qui vient des graines de lapasses
& vole de soy mesme au moindre souspir de vent qu’il fasse.
Noyaulx pour mouler creus
Les animaulx d’or & d’argent se moulent s volontiers creux
pour eviter la pesanteur, et les frais aussy, s’ilz ne sont
bien petits. Mays pour faire l’ame & le noyau, il fault que
le moule soit fraichement moulé & non sec.
Toile d’iraignee
Elle se deffaict dans l’eau & par ainsy ne se peult mouler
en noyau, mays on gecte l’iraigne et puys on dessaigne
les filets tendus entre les herbes qu’elles font aulx champs
sur du quarton avecq une poincte. On fait aultour un bort
de papier collé sur le quarton & on gecte d’estaim bien peu allié
de plomb.
Or fin
Il y a une nature d’or qu’encores qu’il soict fin & sans alliage
& passé par l’eau fort & l’antimoyne est toutesfoys si aigre
qu’il n’endure presque pas le marteau. Et la composition du
verdet cy dessus descripte pour fayre courre l’or, le rend si doux
comme plomb.