Making and Knowing
A minimal edition of BnF Ms Fr 640

[TOC] | [translation]

- - - - - folio image: 124r - - - - -

Animaulx a poil et fleurs foibles
et fort tanvres

Les animaulx a poil sont malaises a mouler pourceque le
poil se releve & se represente comme mesle & a to parcelles amassees
partant il le fault tenir couche avecq quelque chose desiccative
& qui laffermisse Et en cela la plus singuliere chose est
lhuile de froment de laquelle tu loindras Estant gecte tu le
pourras reparer Le corps des papillons et les herbes
qui ont la tige & les foeilles bourrues de certain poil
follet & lanugineulx se doibvent aussy oindre de mesme huile
pour tenir ceste bourre couchee Ensemble les fleurs qui ont la
foeille fort delicate & tanvre car lhuile de froment sec les roidist et affermit
Et si quelquun se vante de mouler ce qui luy sera presente
donne luy a mouler la teste bourrue de lherbe appellee dent
de Lyon
ou un papus qui vient des graines de lapasses
& vole de soymesme au moindre souspir de vent quil fasse

Noyaulx pour mouler creus

Les animaulx dor & dargent se moulent s volontiers creux
pour eviter la pesanteur Et les frais aussy silz ne sont
bien petits Mays pour faire lame & le noyau il fault que
le moule soit fraichement moule & non sec

Toile d’iraignee

Elle se deffaict dans leau & par ainsy ne se peult mouler
en noyau Mays on gecte liraigne et puys on dessaigne
Les filets tendus entre les herbes quelles font aulx champs
sur du quarton avecq une poincte On fait aultour un bort
de papier colle sur le quarton & on gecte destaim bien peu allie
de plomb

Or fin

Il y a une nature dor quencores quil soict fin & sans alliage
& passe par leau fort & lantimoyne Est toutesfoys si aigre
quil nendure presque pas le marteau Et la composition du
verdet cy dessus descripte pour fayre courre lor le rend si doux
comme plomb