123r - - - - - Moyen di far correr l’otnegra
Prens arsenic blanc, deulx unces, 2 ℥
Orpiment ou bien arsenic jaulne, deulx unces, 2 ℥
Aes ustum, deulx unces, 2 ℥
Limaille de cuivre fin mediocrement subtille, 2 ℥
Antimoyne, 2 ℥
Sal gemme, 2 ℥
Tartre crud, 2 ℥
Suin de verre, 2 ℥
Salpestre, la moictié, sçavoir 1 ℥
Sel gros commun fondu, la moictié, 1 ℥
Sublime, la moictié, 1 ℥
Borras, la moictié, 1 ℥
Sel armoniac, aultant que de borras, sçavoir 1 ℥
Prens de ces materiaulx, des meilleurs que tu pourras trouver. Poises
les comme cy dessus est dict et les piles separement, vous tenant
le visaige bandé sur le nes & la bouche, despuys les yeulx en
bas, pour eviter l’exalation de l’arsenic,sublimé et orpiment.
Mesles les bien tous ensemble, puys les mectes dans un bon
crusol qui soict si grand que les matieres y puissent avoir
de vuyde la quarte ou cinquiesme partye. Couvres le crusol
d’un bon tuyle adapté en rond justement sur son ouverture. Et
l’ayant lié de hault en bas et par les costés de fil de fer
assés fort, lutes le avecq de la terre fiens ou terre bourré,
de laquelle les fondeurs d’artiglerie se servent. Et en cela
soyés curieux & diligent, & n’oubliés pas d’y mesler du verre pilé
parmy le luth, pour fortifier vostre crusol, de maniere
qu’il ne prene point de vent, car la matiere ne vauldroit
gueres, à cause que les 4 cinq derniers ingredients s’exhaleroient.
at right top margin
Note qu’il te fault
bien luter ton creuset
affin que les matieres
ne prenent vent, car
elles s’exalleroient.
at right middle margin
Lute bien ton crusol
affin qu’il ne se rompe.
Car s’il se rompt, les
materiaulx s’evaporent
& la fumée en est
dangereuse. Si en 12 heures
il n’est fondu
et meslé, il ne se fera
point bien.
at left middle margin
Les orfevres
qui ont cognoi—
ssance de ceste
matiere vendent
le denier d’icelle
cinq sols aulx
aultres orfevres
& mesmement
à ceulx qui
travaillent de
vaissele & grosserie,
car à la fin de
leurs ouvraiges,
ilz peuvent soulder
sur la premiere
souldure par le
moyen de
ceste mixture.
En general,
touts
ceulx qui veulent
mouler & gecter
quelque chose
subtille. Ceste
matiere ne doibt
pas estre divulguée
affin quil n’en soit
point abusé.
at left bottom margin
Le grain est comme
de l’acier rompu.
[continued]