119r - - - - - [continued]
Comme j’ay veu qu’ilz ne fumoient plus & que, grattant le revers &
l’endroict du gect & trouvant qu’ilz estoient aussy aspres & fermes & durs
d’un costé que d’aultre, qui est un bon signe d’estre bien secs, je les
ay mis froidir. J’ay prins de l’estain fin f une lb & une once de
plomb fin & noeuf. Je l’ay fondu dans un crusol jusques à ce que il
estoit un peu comme un peu rouge. Estant ainsy bien chault, j’ay fumé &
non p & estant prest à gecter & non plustost, j’ay fumé avecq la fumée
d’une chandelle de suif tous les costés de mes chassis & empraincts
& gect & tout. J’ay disposé mon chassis bien joinct dans la presse.
J’ay tiré mon creusol du feu. Je lui ay un peu laisser passer amortir
la rougeur du fonds du crusol. Et voulant gecter, j’ay gecté dedans
deulx ou trois grains comme poix de rousine, & quand & quand la grosseur
d’une febve d’estain de glace, & ay brouillé & remué un peu le crusol
et ay gecté, et la medaille est venue aussy nette que le principal.
Je l’ay fumée à la chandelle & avecq des sayes l’ay nettoyée.
at left middle margin
Gecte tousjours
par le pied de la
medaille car
la teste qui
est en bas
en viendra mieulx, &
fais le gect
longuet. Et
quand tu
gecteras en
un grand
chassis
plusieurs
medailles,
elles
viendront
mieulx.
Advertissement sur ce que dessus
Le bon estain est celuy qui est dur comme argent & doulx neantmoings.
Si ton ouvraige est tanvre, il fault que ce soit presque tout estain
& alié comme dict est.
L’estain de glace ne se doit fumer mesler que à l’instant que tu
veulx gecter.
Ne les formes ne se doibvent fumer qu’alors.
Si le sable se retire dans le chassis, c’est à dire qu’il le fault recuire
& rougir au foeu.
Le bon sable ne prend poinct à la main en le pressant estant humecté.
Le parfaict sable pour le chassis est l’aspalt qui se trouve en
Allemaigne, qui est doulx comme farine & presq estant mouillé, et presque
tous les aultres sont grumeleux.
Nota que le gect doit estre tanvre & peu espés affin de ne
travailler point la matiere, et ne doit point passer l’espesseur d’un
travers d’un grain de bled, mesmement pour l’estain, qui veult estre
gecté fort tanvre. Pour le plomb, un peu plus espés. Il n’est point besoing de fayre les souspirails fort larges & profonds aussy.
Pour chassis, le sable qui te sert à noyau de la composition susditte
est excellent. Mays en le lavant, broyant & recuisant plusieurs fois, il
le fault corrompre de son naturel & qu’il ne soit point propre à faire
prise & mouler en noyau.